‘ओलीभन्दा देउवा धेरै इमान्दार’

नेकपा माओवादी केन्द्रका अध्यक्ष पुष्पकमल दाहाल प्रचण्डले प्रधानमन्त्री तथा एमाले अध्यक्ष केपी शर्मा ओलीभन्दा नेपाली काँग्रेसका सभापति शेरबहादुर देउवा निकै इमान्दार रहेको टिप्पणी गर्नुभएको छ । सुर्खेतको वीरेन्द्रनगरमा सञ्चारकर्मीहरुसँग कुराकानी गर्दै उहाँले सभापति देउवा प्रधानमन्त्री ओलीजस्तो बेइमान नरहेको ठोकुवा गर्नुभएको छ ।

प्रधानमन्त्री ओलीले ‘भ्रष्टाचार गर्दिनँ र गर्नेलाई पनि छोड्दिनँ भन्दै भ्रष्टाचारीलाई संरक्षण गरिरहेको’ प्रचण्डको आरोप छ । ‘उहाँ (ओली)ले यति मिठा नारा दोहोर्याउँदै आउनुभएको छ कि, तर के गर्नु, काम चाहिँ ठिक उल्टो छ’, उहाँले भन्नुभयो, ‘बरु शेरबहादुरजी इमान्दार हुनुहुन्छ, केपीजस्तो जालीझेली र बेइमानी हुनुहुन्न ।’

पूर्व प्रधानमन्त्रीसमेत रहनुभएका प्रचण्डले वर्तमान गठबन्धनको औचित्य पुष्टि नभए पनि भत्काउने र बनाउने खेलमा माओवादीको कुनै चासो नरहेको समेत स्पष्ट पार्नुभयो । ‘सरकारतिर हाम्रो ध्यान छैन । जति चलोस्, चलोस्, ०८४ पछिसम्म गए पनि हामीलाई टेन्सन छैन,  हामी जनतामा गएका छौँ’, उहाँले थप्नुभयो । 

अध्यक्ष प्रचण्डले नेत्रविक्रम चन्द विप्लव नेतृत्वको नेपाल कम्युनिष्ट पार्टी र माधव नेपाल नेतृत्वको नेकपा (एकीकृत समाजवादी)सँग एकताको प्रयास गरिए पनि ठोस आकार नपाइसकेको उल्लेख गर्नुभयो ।