एमाले कार्यकर्ता किन दह्राे जवाफ दिन्नन्

नेकपा एमालेको दशौँ राष्ट्रिय महाधिवेशनमा अध्यक्षमण्डलबाट अध्यक्ष केपी शर्मा ओलीको प्रस्तावबिनै निर्विरोध केन्द्रीय सदस्य भएकी उषाकिरण तिमल्सिना नेतृत्वबारे निरन्तर मुखर भइरहन्छिन् । उनका भनाइकै कारण पार्टीका कुरा सार्वजनिक मञ्चमा लगेको भन्दै स्पष्टीकरण पनि सोधिएको छ । 

गत शनिबार मात्रै एउटा सञ्चारमाध्यमले गरेको सार्वजनिक कार्यक्रममा उनले अहिलेको नेतृत्व र अध्यक्ष ओलीबारे घतलाग्दो टिप्पणी गरिन् । माधव नेपालसहितले दुई लाइन संघर्ष चलाउँदा सडकमै भिड्नसमेत तयार उनले अध्यक्ष कमरेडले भनेपछि सबै कुरा चल्छ भन्नु नै एमालेभित्रको प्रमुख समस्या रहेको ब्याख्या गरिन् । ‘एमालेमा अन्तरपार्टी लोकतन्त्र कमजोर भइरहेको छ । चिसो भनेकै कोकाकोला भनेजस्तै नेता भनेका केही नेता हुन् । र, ती नेताका पनि नेता भनेका कमरेड अध्यक्ष हुन् भनिन्छ । अध्यक्षले भनेपछि सबै कुरा हुन्छ र चल्छ भन्ने ठान्नु नै आजको प्रमुख समस्या हो’, उनले यसरी समस्याको सटिक टिप्पणी गरिन् । उषाको नजरमा एमालेको खम्बा रहेका कार्यकर्तालाई काम र भूमिका नदिनु अर्को समस्या हो । असोज २५ गते ओलीले कीर्तिपुर नगरपालिका–२ मैत्रीनगरस्थित व्यवसायी मीनबहादुर गुरुङले दिएको जग्गामा पार्टीको केन्द्रीय कार्यालय भवन शिलान्यास गरेपछि विरोधमा उत्रिनेमध्ये एक उनै उषाकिरण पनि हुन् । कात्तिक २ गते एमालेले पूर्वउपाध्यक्ष डा. भीम रावल र नेतृ विन्दा पाण्डेलाई पनि स्पष्टीकरण सोध्यो । 

तर, कात्तिक १२ गते सर्वोच्च अदालतका न्यायाधीश सुनीलकुमार पोखरेलले जग्गा दान लिई हक हस्तान्तरणलगायत काम कारबाहीविरुद्ध अल्पकालीन अन्तरिम आदेश दिएसँगै उनीहरूमाथिको कारबाही टर्‍यो । उक्त अल्पकालीन अन्तरिम आदेशपछि एकातिर एमालेको पार्टी कार्यालय निर्माण रोकियो भने तीन नेतामाथिको कारबाही पनि अघि बढ्न पाएन ।

यद्यपि अस्ति सोमबार सर्वोच्च अदालतले दाने जग्गाविरुद्ध परेको रिट नै खारेज गरिदिएर मीनबहादुर गुरुङको कोशेली खाने बाटो खोलिदिएको छ । गुरूङसँग दान लिएर केन्द्रीय कार्यालय बनाउनुलाई साढे पाँच लाख पार्टी सदस्यको स्वाभिमानी शिर झुकाउने कदम भनेकी विन्दा र उनलाई साथ दिने उषा दुवै अहिले पनि बोल्न छाडेका छैनन् । उषाले शनिवार अध्यक्ष ओलीबारे तिखो टिप्पणी गर्दै गर्दा भारतीय सञ्चारमाध्यम नवभारत टाइम्सले एकजना पूर्वजासुससँग लिएको अन्तर्वार्ता नेपालमा भाइरल भइरहेको छ । ‘रअ’का पूर्वएजेन्ट भनी चिनिने विवादित पृष्ठभूमिका लक्ष्मण सिंह (लक्की विष्ट) सँगको उक्त अन्तर्वार्ताले नेपालमा चर्चा पाएको हो । भारतीय प्रधानमन्त्री नरेन्द्र मोदी र उत्तर प्रदेशका मुख्यमन्त्री योगी आदित्यनाथको सुरक्षा गार्ड रहिसकेका भनिएका यी पूर्वजासुसले ओली नेतृत्वको सरकार केही दिनमै ढल्ने दाबी गर्न भ्याएका थिए । अन्तर्वार्तामा उनले नेपालमा सरकार परिवर्तन हुने सनसनीपूर्ण दाबी गरेका छन् । 

‘आज १२ तारिख हो । अचम्म लाग्ला, तपाईंंले केही दिन (१०–१५) पछि एउटा अर्को समाचार सुन्नुहुन्छ, नेपालको सरकार ढल्नेवाला छ, ’ उनले भनेका छन् । यी कुरा संयोग मात्रै होइनन् । गत शनिबार चितवन पुगेका गृहमन्त्री रमेश लेखकले आर्थिक गतिविधि चलायमान नभएको, सुशासन नभएको, विकास निर्माण अघि नबढेकोसहितका कारण देखाउँदै यी सबै कुराका लागि वर्तमान गठबन्धन बनेको बताए । तर दुईतिहाइ नजिकको सरकार ढल्नेबारे उनले त्यहाँ पनि रक्षात्मक भएर बोल्नुपर्‍यो । वर्तमान गठबन्धनबारे विभिन्न हल्ला फैलाउने कोसिस भएको भन्दै उनले ०८४ सालसम्मै जाने जिकिर गरेका छन् । अर्थात्, लेखकले पनि घुमाउरो भाषामा अहिले सरकार तलमाथि नहुने, नढल्ने विश्वास पत्रकारलाई दिनु परेको अवस्था छ ।