प्रधानमन्त्रीसँग भारत भ्रमणको उपलब्धि सुनाउन माग

सत्ता साझेदार दल नेकपा एमालेका सांसद रघुजी पन्तले प्रधानमन्त्री पुष्पकमल दाहाल प्रचण्डको भारत भ्रमणबारे संसदमा जानकारी गराउन रुलिङको माग गरेका छन् । 

आज प्रतिनिधि सभा बैठकमा बोल्दै उनले भारत भ्रमणका क्रममा भएका विषयको संसदलाई जानकारी गराउन प्रधानमन्त्रीलाई सभामुखले रुलिङ गर्नुपर्ने बताए । संसदको विशेषाधिकार भएकाले प्रधानमन्त्रीलाई संसदमा जानकारी गराउन सभामुख आफैंले अग्रसरता लिनुपर्ने पन्तको भनाई छ । 

त्यसक्रममा उनले १९५० को सन्धि, इपिजी प्रतिवेदन, सीमा समस्या, सार्क जस्ता विषयमा दुई देशका प्रधानमन्त्रीबीच के कुराकानी भए भन्नेबारे संसदले जान्न चाहेको बताए । नेपाल-भारत समस्या अहिले पनि ज्युँकात्युँ रहेपनि प्रधानमन्त्री प्रचण्डले कुनै समस्या नभए जसरी अभिव्यक्ति दिएको भन्दै सांसद पन्तले आपत्ति पनि जनाए । 

यस्तो छ उनको भनाई :

सार्क लथालिंग भयो । सार्क मात्रै होइन, सार्क युनिभर्सिटी, जो दिल्लीमा छ । त्यसको पनि सार्कको समयमा बैठक नबसेको कारण त्यसमा विभिन्न देशहरुले बजेट दिनुपर्नेमा त्यो समयमा नआएको कारणले योसमेत लथालिंग हुने अवस्थामा पुगेको छ । सार्कको अध्यक्ष भएको नेपालले यो विषयमा इनिसिएशन लिनुपर्छ कि पर्दैन ? यो विषयमा आफ्नो धारणा प्रष्ट राख्नुपर्छ कि पर्दैन ? सार्कको सचिवालय काठमाडौंमा छ । नेपालमा छ । त्यसैले यदि भारत र पाकिस्तानको विवादले पाकिस्तानमा सम्मेलन हुन सक्दैन भने भोली श्रीलंका र अन्य कुनै देशमा पर्यो भने हुन सक्दैन भने नेपालले अघि बढेर भन्नु पर्छ–सार्कको गतिविधिलाई रोक्न सकिदैन । त्यसको विवाद कुनै देशसँग भएमा हामी काठमाडौंमा सम्मेलन गर्छौं । यो अधिकार चाहियो भनेर भन्नु पर्छ । 

भर्खरै प्रधानमन्त्री दिल्ली गएर आउनु भयो । मोदीजीको तेस्रो पटकको सपथग्रहण कार्यक्रम गएर उहाँ आउनुभयो । एयरपोर्टमा आएर उहाँले सबै विषयमा कुरा भएको कुरा गर्नुभयो । हाम्रो सम्बन्ध मित्रतापूर्ण ढंगले अघि बढिराखेको छ भन्नुभयो । योभन्दा अगाडि पनि त्यसै भन्नुहुन्थ्यो, त्योभन्दा अगाडि अर्को प्रधानमन्त्रीले पनि त्यसै भन्नुहुन्थ्यो । 

तर, सीमाको समस्या त्यत्तिकै छ । हाम्रो इपिजीको प्रतिवेदन त्यत्तिकै छ । १९५० को सन्धि त्यत्तिकै छ । भारतसँग थाति रहेका हाम्रा समस्याहरु जस्ताको तस्तै विद्यमान छन् । त्यसैले सभामुखज्यूबाट आज रुलिङ हुनुपर्छ–प्रधानमन्त्रीले बोलेर आएपछि बोल्ने पहिलो ठाउँ भनेको संसद हो । उहाँको भारतीय प्रधानमन्त्रीसँग के-के विषयमा दुईपक्षीय हितका, बहुपक्षीय हितका, सार्कका विषयमा, नेपाल र भारतका बीचमा बाँकि रहेका विभिन्न समस्याहरुलाई समाधान गर्ने विषयमा सम्मानीय प्रधानमन्त्रीजीको भारतीय प्रधानमन्त्रीसँग के-के विषयमा कुराकानी भयो ? उहाँले यो संसदलाई सम्मान गर्ने हो भने आजै आएर यो संसदमा आफ्नो भारत भ्रमणबारे, त्यहाँ भएको कुराकानीबारे विस्तृत रुपमा जानकारी दिनुपर्दथ्यो ।

त्यसकारण म सभामुखज्युको ध्यानाकर्षण गर्दछु–रुलिङहोस प्रधानमन्त्रीज्यूलाई । भारत भ्रमणको हाम्रो र भारतबीचको विद्यमान समस्या समाधानको विषयमा के कुरा ठोस रुपमा भए, त्यसबारे यो संसदले जानकारी पाओस । संसदको विशेषाधिकार हो सभामुखज्यू यो । सभामुखज्यूले पनि यसमा आँखा चिम्लिन मिल्दैन । ’