‘गाईजात्रा’ व्यहोरेका भूतपूर्व प्रधानमन्त्रीलाई ‘महाजात्रा’ हेरेपछि आनन्द

केही समयअघिअ आफ्नै पार्टीभित्र ‘गाईजात्रा’ व्यहोर्नु भएका पूर्वप्रधानमन्त्री एवम् नेपाल समाजवादी पार्टीका अध्यक्ष डा. बाबुराम भट्टराईले चलचित्र ‘महाजात्रा’ हेर्नुभएको छ । 

हिजो साँझ छोरी तथा नेतृ मानुषी यमी भट्टराईसँगै ठमेलस्थित छायाँ सेन्टरमा रहेको हलमा चलचित्र हेर्नुभएको हो । चलचित्र हेरेपछि उहाँले ‘महाजात्रा’ लाई रेटिङ गर्दै १० मा ८ अंक दिनुभएको छ । 

हलबाट बाहिरिँदै गर्दा उहाँले भन्नुभयो, ‘यो फिल्म आम दर्शकदेखि राजनीतिज्ञसम्मलाई सुहाउँदो बनेको छ । म यसलाई १० मा ८ नम्बर दिन्छु ।’ 

डा. भट्टराईले सामाजिक सञ्जालमार्फत् पनि चलचित्रको प्रंशसा गर्नुभएको छ । उहाँले सत्यनिष्ठामा रहन प्रयत्न गर्नेहरूको निजी र पारिवारिक पीडालाई चलचित्रले निकै मार्मिक ढंगले उठाएको बताउनुभयो ।

थप लेख्नुभएको छ, ‘महिला पात्रहरूलाई सँधै पुरूषहरूको लाचार छायाँको रूपमा उभ्याइने फिल्मी परम्परालाई तोड्दै उनीहरूको स्वायत्तता र सत्यनिष्ठामा जोड फिल्मको विशेष सबल पक्ष मान्नुपर्दछ ।’

यसअघि नकेपा (एमाले) का अध्यक्ष केपी शर्मा ओलीले महाजात्रा हेरेर ९.५ को रेटिङ गर्नुभएको थियो । उपप्रधानमन्त्री तथा गृहमन्त्री रवि लामिछाने, पूर्वरानी कोमल शाहलगायतले पनि चलचित्र हलमा पुगेर हेरिसक्नुभएको छ । 

प्रदीप भट्टराईको लेखन तथा निर्देशन रहेको चलचित्रमा हरिवंश आचार्य, विपिन कार्की, रविन्द्र सिंह बानियाँ, वर्षा राउत, रविन्द्र झालगायतको अभिनय छ । चैत ९ गतेदेखि प्रदर्शनमा आएको यो चलचित्रले अहिलेसम्म १४ करोड रुपैयाँ संकलन गरेको बताइन्छ ।