बुसानको परीक्षा उत्तीर्ण गरेर तीन नेपालीले पाए रेफ्री लाइसेन्स

इन्टरनेशनल ई–स्पोर्ट्स फेडरेशन (आईईएसएफ) ले तीन जना नेपाली प्रतिनिधिलाई रेफ्री लाइसेन्स प्रदान गरेको छ । ‘वर्ल्ड ई–स्पोर्ट्स समिट, २०२३’ को अवसरमा दक्षिण कोरियाको बुसानस्थित वर्ल्ड ई–स्पोर्ट्स रेफ्री एकेडेमीमा भएको परीक्षा उत्तीर्ण गर्दै उनीहरुले लाइसेन्स प्राप्त गरेका हुन् । 

फेडेरेशनद्वारा भौतिक उपस्थितिमा पहिलोपटक आयोजित कार्यक्रममा सात मुलुकका २४ जना सहभागी थिए । दुई दिने कक्षापछि भएको परीक्षामा नुवाकोटका क्षितिज श्रेष्ठ, अरुण मिश्र र सौजन्य श्रेष्ठले सफलता हात पारेका हुन् । फेडरेशनको रेफ्री कोर्स उत्तीर्ण गर्ने उनीहरु पहिलो नेपाली हुन् । 

अब उनीहरुले ई–स्पोर्ट्स प्रतियोगिता सञ्चालन गर्न पाउनेछन् । नेपाल ई–स्पोर्ट्स एशोसिएशनको सिफारिसमा वर्ल्ड ई–स्पोर्ट्स रेफ्री एकेडेमी, २०२३ मा सहभागी भएका उनीहरुलाई अमेरिकाका जेम्स उड, पिटर स्टेन्सनी, कोरियाका ली सुङ वन, अर्जेन्टिनाका निकोलस क्रेस्पोले प्रशिक्षण दिएका थिए । 

मोटर स्पोर्ट्सका मार्शलसमेत रहेका क्षितिज बुद्धिचाल (चेस) का निर्णायक हुन् । अरुण र सौजन्य चीनको हाङजाउमा भएको एशियाली खेलकुदमा ई–स्पोर्ट्स खेलअन्तर्गत ड्रिम थ्री किङ्डम खेल्ने नेपाली खेलाडी हुन् ।