सरकारी तथा सार्वजनिक संस्थानका गाडीमा इम्बोस्ड नम्बर प्लेट अनिवार्य
भौतिक पूर्वाधार तथा यातायात मन्त्रालयले सरकारी तथा सार्वजनिक संस्थानका गाडीहरुमा अनिवार्य इम्बोस्ड नम्बर प्लेट जडान गर्न निर्देशन दिएको छ । फागुन मसान्तसम्मको समयसीमा दिँदै मन्त्रालयले सरकारी तथा सार्वजनिक संस्थानका गाडीहरुमा अनिवार्य इम्बोस्ड नम्बर प्लेट जडान गर्न भनेको हो ।
कोशी प्रदेशबाहेक अन्य प्रदेशका यातायात व्यवस्था कार्यालयमा दर्ता हुने तथा दर्ता कायम रहेका सवारीमा इम्बोस्ड नम्बर प्लेट जडान गर्न आग्रह गर्दै मन्त्रालयले २०७९ मंसिर १ गते पत्र पठाएको थियो । हालसम्म पनि सरकारी तथा संस्थानका सवारी साधनहरुमा इम्बोस्ड नम्बर प्लेट जडानको कार्य प्रगति न्यून भएपछि संघीय मन्त्रालयले पुनः प्रदेशका मन्त्रालय र यातायात व्यवस्था कार्यालयहरुलाई पत्र लेखेको हो ।
भनिएको छ,‘हालसम्म पनि अधिकांश सरकारी तथा सार्वजनिक संस्थानका सवारी साधनहरुमा समेत इम्बोस्ड नम्बर प्लेट जडानको कार्यको प्रगति न्यून देखिएकोले त्यहाँ कार्यालय र मातहतका निकायको स्वामित्वमा रहेका सवारी साधनहरुमा मिति २०८० फागुन मसान्तसम्म अनिवार्य रुपमा इम्बोस्ड नम्बर प्लेट जडान गर्ने व्यवस्था हुन यस मन्त्रालयको मिति २०८०–०८–२८ को निर्णयानुसार अनुरोध छ ।’
सरकारले सम्पूर्ण सवारी साधनमा इम्बोस्ड नम्बर प्लेट जडानका लागि लामो समयदेखि प्रयास गरिरहेको छ । तर, भाषाको विवादका कारण इम्बोस्ड नम्बर प्लेट जडानको कार्य अलमलमा परेको छ ।
टिप्पणीहरू