एनआरएनएकाे असन्तुष्ट समूह हिजो कफी शपमा, आज परराष्ट्र मन्त्रालयमा
गैरआवासीय नेपाली संघ (एनआरएनए) का स्वःघोषित अध्यक्ष राजकुमार शर्मा (आरके) नेतृत्वको कार्यसमितिले आधिकारिताको मागसहित परराष्ट्र मन्त्रालयमा निवेदन दर्ता गराएको छ ।
आरके नेतृत्वको कार्यसमितिलाई आधिकारिताको दाबी गर्दै उनको पक्षले आज परराष्ट्रमा निवेदन दर्ता गरेको हो । महाअधिवेशन सम्पन्न गरेको कागजात पेश गर्दै उक्त पक्षले आफ्नो कार्यसमिति आधिकारिक रहेको दाबी गरेको छ ।
दर्ता नम्बर ११२३ रहेको निवेदनमा अध्यक्ष आरके शर्मा, महासचिव बुद्धि सुवेदीलगायतको नाम उल्लेख छ । आधिकारिताको दाबी गर्दै निवेदन दर्ता गरिए पनि तत्काल निर्णय नहुने मन्त्रालय स्रोतले जनाएको छ ।
काठमाडौंबाट मतदान गरेका उपाध्यक्षका उम्मेदवार डा. केशव पौडेलको शून्य मत आएपछि एनआरएनएमा विवाद सिर्जना भएको थियो ।
कात्तिक २ गतेको अनलाइन भोटिङ्गमा धाँधली भएको उल्लेख गर्दै चर्को विरोध गरिएको थियो । अध्यक्षका उम्मेदवार आरके शर्मा र महेशकुमार श्रेष्ठले मत परिणाम अस्वीकार गरेका हुन् ।
यसअघि संघका अध्यक्ष बद्री केसी र स्वःघोषित अध्यक्ष शर्माबीच हिजो ठमेलको हिमालयन जाभामा भेटवार्ता भएको थियो । उक्त भेटमा शर्माले पुनः निर्वाचन हुनुपर्ने माग राखेका थिए ।
शर्माको भनाई उद्धृत गर्दै स्रोतले भन्यो, ‘चुनावमा अनियमितता भयो, त्यसलाई सच्याउनु भनेको पुनर्निर्वाचन हो । तर केसीले मानेनन् ।’ गत शुक्रबारको निर्वाचन परिणामको विषयमा प्रश्न उठेपछि केसीसहित कुल आचार्य र रविना थापाले निर्वाचन प्रक्रिया स्थगित भएको घोषणा गरेका थिए ।
निर्वाचन समितिले केसीलाई विजयीको घोषणा गरेर अध्यक्षको शपथ गराएको थियो । त्यसपछि असन्तुष्ट पक्षले आरके शर्मालाई अध्यक्ष चयन गरेको हो ।
भेरो अनलाइन भोटिङमार्फत् भएको एनआरएनए निर्वाचनमा सिस्टम ह्याक गरेर मतपरिणाम तलमाथि गरिएको शर्मा पक्षको दाबी छ ।
टिप्पणीहरू