भगवती पाण्डेलाई तत्काल पक्राउ नगरे सडकमा उत्रने चेतावनी

नेपाल तामाङ घेदुङले कानूनी व्यवसायी भगवती पाण्डेलाई तत्काल पक्राउ नगरे सडक आन्दोलन गर्ने चेतावनी दिएको छ । 

किटानी जाहेरी परिसकेको अवस्थामा पनि पाण्डेलाई पक्राउ गर्न आलटाल गरिएको भन्दै घेदुङले आन्दोलनको चेतावनी दिएको हो । 

‘कानून व्यवसायी भगवती पाण्डेलाई यथाशीघ्र पक्राउ गरी कानूनबमोजिम हदैसम्म सजाय गर्न हामी नेपाल सरकार, गृह मन्त्रालय र प्रहरी प्रशासनको गम्भिर ध्यानाकर्षण गराउँदछौं,’ घेदुङले आज जारी गरेको विज्ञप्तिमा भनिएको छ, ‘यदि अझैपनि निजलाई पक्राउ गरी कानूनबमोजिम कारबाही नगर्ने र आलटाल गरिरहने हो भने हामी तत्काल सडक संघर्षमा जाने र त्यसबाट उत्पन्न परिस्थितिको स्वयंम राज्य व्यवस्था जिम्मेवार हुने पनि जानकारी गराउन चाहन्छौं ।’

अधिवक्ता पाण्डेले गत साउन ६ गते एक टेलिभिजन अन्तर्वार्तामा तामाङ र मगर समुदायको मानमर्दन गरेको आरोप छ । यो समुदायमा विगतदेखि चल्दै आएको दाजुबहिनीबीचको विवाह सम्बन्धबारे उनले गैरजिम्मेवारपूर्ण टिप्पणी गरेको विज्ञप्तिमा जनाइएको छ । 

पाण्डेले भैंसी र बाख्रामा पनि एकै जिनबीचको यौन संसर्गबाट जन्मिएको सन्तान राम्रो नहुने हुँदा यस्तो यौन सम्बन्धलाई बार्नुपर्ने देखिन्छ भन्दै मानिसको सम्बन्धमा खुल्ला छोड्दा अपराध सिर्जना गर्ने बताएकी थिइन् । उक्त अभिव्यक्तिले सिंगो तामाङ, मगरलगायत आदिवासी जनजाति समुदायको आत्मसम्मान र प्रतिष्ठामा गम्भिर चोट पुर्याएको विज्ञप्तिमा उल्लेख छ । 

पाण्डेको उक्त अभिव्यक्तिले नेपालको बहुजातीय, बहुधार्मिक र बहुसांस्कृतिक समाजको धार्मिक, सांस्कृतिक सहिष्णुतामाथि खलल पुगेको तथा जातीय भेदभाव तथा छुवाछुत ऐन, २०६८, मुलुकी अपराध संहिता, २०७४ र विद्युतीय कारोबार ऐन, २०६३ समेथ आकर्षिक हुन जाने देखिएको भन्दै तामाङ र मगर समुदायको राष्ट्रिय साझा संस्थाद्धय नेपाल तामाङ घेदुङ र नेपाल मगर संघले गत साउन ९ गते जिल्ला प्रहरी परिसर टेकु काठमाडौंमा जोहरीसमेत दर्ता गराएका थिए । 

तर, जाहेरी दरखास्त दिएको एक साता बितिसक्दा पनि अभिवक्ता पाण्डे पक्राउ नपरेको भन्दै उनीहरुले सडक संघर्षमा जाने चेतावनी दिएका हुन् ।