आगामी १० वर्ष ‘पर्यटन दशक’, यो वर्ष १० लाख पर्यटकको लक्ष्य

सरकारले सन् २०२३ देखि २०३२ सम्मको १० वर्षको अवधिलाई पर्यटन दशक घोषणा गरेको छ ।  बजेट भाषणका क्रममा अर्थमन्त्री डा. प्रकाशशरण महतले उक्त घोषणा गर्नुभएको हो । 

उहाँले सन् २०२३ मा नेपालमा आउने पर्यटकको संख्या १० लाख पुर्याइने घोषणा समेत आगामी आर्थिक वर्षको बजेटले गरेको बताउनुभयो । साथै, यो वर्ष ‘नेपाल घुमौं, नेपाल चिनौं’ अभियान पनि चलाइने भएको छ । 

अर्थमन्त्री महतले ताप्लेजुङदेखि ग्रेट हिमालन ट्रेल निर्माणलाई तीब्रता दिने तथा पोखरा–मुस्ताङ पदमार्गलाई पनि प्राथमिकतामा राखेको जानकारी दिनुभयो । त्यस्तै, पर्यटकीय पदमार्ग निर्माण गर्न पशुपति गुरुयोजना, लुम्बिनी गुरुयोजनाको काम गरिने छ । जनकपुर, स्वर्गद्वारी, मुक्तिनाथलाई समेटेर सर्किट निर्माण गरिने छ । 

नयाँ बजेटमा पर्यटन क्षेत्रलाई प्राथमिकता दिइएको बताउँदै अर्थमन्त्री महतले ११ अर्ब ९६ करोड रुपैयाँ बजेट विनियोजन गरिएको जानकारी पनि दिनुभयो । चालु आवमा ९ अर्ब ३८ करोड रुपैयाँ बजेट विनियोजन गरिएको छ ।