सरकारी सवारी साधनमा ईम्बोस्ड नम्बर प्लेट अनिवार्य
भौतिक पूर्वाधार तथा यातायात मन्त्रालयले नेपालभरका सम्पूर्ण सरकारी सवारी साधनमा अनिवार्य रुपमा ईम्बोस्ड नम्बर प्लेट जडान गर्नुपर्ने निर्णय गरेको छ ।
मन्त्रालयले सम्पूर्ण सरकारी, संस्थान, संघ प्रदेश र स्थानीय तहका सवारी साधनमा अनिवार्य रुपमा ईम्बोस्ड नम्बर प्लेट जडान गर्नुपर्ने निर्णय गरेको हो ।
यातायात व्यवस्था विभागले आउँदो फागुन मसान्तसम्म अनिवार्य रुपमा ईम्बोस्ड नम्बर प्लेट जडान गरिसक्नुपर्ने सूचना जारी गरेको छ ।
‘मन्त्रालयले मिति २०७९–७–२८ गते प.स. २०७९–८० च.नं.२.१–५३७ बाट सम्पूर्ण सरकारी, संस्थान, संघ प्रदेश र स्थानीय तहका सवारी साधनहरुमा आगामी २०७९ फागुन मसान्तसम्म अनिवार्य रुपमा ईम्बोस्ड नम्बर प्लेट जोडिसक्नुपर्ने निर्णय गरेको हो’, सूचनामा भनिएको छ ।
विभागको वेबसाइटमा गएर ईम्बोस्ड नम्बर प्लेटका लागि आवेदन दिनुपर्नेछ । त्यसपछि नजिकको यातायात व्यवस्था कार्यालयमा गई तोकिएको राजस्व तिरेर नम्बर प्लेट जडान गर्न सकिने विभागले जनाएको छ ।
काठमाडौं उपत्यकाको हकमा यातायात व्यवस्था कार्यालयमा राजस्व बुझाएर विभागको कार्यालय, मीनभवनबाट नम्बर प्लेट लिनुपर्नेछ ।
टिप्पणीहरू