सुँगुरको मुटु प्रत्यारोपण गरेका व्यक्तिको ज्यान जानुको कारणबारे अनकौं आशंका
अमेरिकाको मेरिल्याण्डका ५७ वर्षीय डेभिड बेनेट सिनियर प्रत्यारोपण विफलतासँग जोडिएको सुँगुरको भाइरसको शिकार भएको हुन सक्ने वैज्ञानिकहरूले विश्वास गरेका छन् ।
सुँगुरको भाइरसका कारण उनको मृत्यु भएको हुन सक्ने प्रत्यारोपणमा संलग्न शल्यचिकित्सक डा. बार्टले ग्रिफिथले बताएका हुन् । बेनेटको शल्यक्रिया जनवरी ७ मा बाल्टिमोर युनिभर्सिटी अफ मेरिल्यान्ड मेडिकल सेन्टरमा भएको थियो । तर, शल्यक्रिया गरिएको दुई महिनापछि उनको मृत्यु भएको हो ।
‘शल्यक्रियापछि प्रत्यारोपित मुटुले केही सातासम्म कुनै अवरोधबिना धेरै राम्रो काम गरेको थियो । तर, शल्यक्रियापछि उनको अवस्था झनै बिग्रँदै गयो’, मेडिकल सेन्टरद्वारा जारी विज्ञप्तिमा भनिएको छ ।
सुँगुरको भाइरसले यस्ता प्रत्यारोपणका बिरामीलाई आजीवन निगरानी गर्नुपर्ने चासोलाई उजागर गरेको विज्ञहरू विश्वास गर्छन् । बेनेटको मुटु पोर्सिन साइटोमेगालो भाइरसबाट संक्रमित भएको जनाइएको छ । यस्ता संक्रमितलाई श्वासप्रश्वासको जटिल समस्या देखिने गरेको अनुसन्धानबाट खुलेको छ ।
बेनेटमा प्रत्यारोपण गरिएको सुँगुरको मुटु बायोटेक कम्पनी रेभिभिकोरले तयार पारेको थियो ।
टिप्पणीहरू