युक्रेनमा युद्धरत रुसद्वारा नेपाललाई हतियार दिने प्रस्ताव

विश्व शक्तिको रुपमा चिनिएको राष्ट्र रुसले युक्रेनमाथि हमला थालेको २६ औं दिन (मार्च २० तारिख) नेपाललाई सैन्य सहयोग र सहकार्यका निम्ति प्रस्ताव पठाएको छ । परराष्ट्र मन्त्रालयमार्फत प्राप्त प्रस्ताव अहिले जंगी अड्डा पुगेको छ । नेपालले एमसीसी पास गरेर युक्रेनपट्टि ढल्केपछि रुस नेपालसँग झस्केको हो । केही रक्षा विशेषज्ञले भने नेपाली सेना केही प्रविधि र सामग्रीमा रुसमाथि निर्भर रहेकाले अब सहकार्य गरी अघि बढौं भनेर यो पत्र लेखिएको निश्कर्ष निकालेका छन् । नेपालमा विदेशी नियोगको सबैभन्दा ठूलो दूतावासमध्ये भारतपछि शायद रुसको हो ।

पत्रको मुख्य बुँदा नेपालसँग भएका सैन्य आदानप्रदानलाई औपचारिक बनाउने रहेको छ । रुसले नेपाललाई हेलिकप्टरलगायत विभिन्न किसिमका सैन्य सामग्री बेच्नुका साथै प्राविधिक सहयोग पनि बेला बेला उपलव्ध गराउँदै आएको छ । यी सहयोग सामग्रीमा रहेका प्याटेन्ट राइटहरूको सुरक्षासमेत यति नै बेला खोजेको बुझिएको छ । उताबाट ल्याइएका त्यस्ता सामग्रीको सूचना रुसले नचाहेका अन्य राष्ट्रमा नपुगोस् भन्ने मुख्य चासो रहेको पत्रबाट बुझिन्छ । पत्रमा सैन्य सहयोगबारे भएका क्रियाकलाप दुई मुलुकबाहेक अन्य कसैलाई जानकारी दिने छैन भन्ने आशयसहितका बुँदा उल्लिखित छन् । सैन्य सामग्री, सैन्य प्रविधि र प्राविधिक सहयोग आवश्यक परेको बेला एक अर्कालाई उपलब्ध गराउने बुँदा पनि प्रस्तावमा समेटिएको छ ।

रुसबाट एमआई सिरिजका हेलिकप्टरसहितका सैनिक सामग्री नेपालले कहिलेकाहीँ खरिद गर्दै आएको छ । रुसको प्रसिद्ध हतियार एके ४७ राइफल भने नेपाल सरकारले किनेको छैन । सो राइफल द्वन्द्वकालमा माओवादीले प्रयोगमा ल्याएका थिए । रुसले एके ४७ राईफल भारतमै उत्पादननिम्ति भर्खरै सम्झौता गर्नुका साथै लडाकु विमान मिग र सुखोइहरू दिएर छिमेकीको वायुसेनालाई मजबुत बनाएको अवस्था छ । यसैको विरुद्धमा अमेरिकाले पाकिस्तानलाई एफ १६ लगायत फाइटर विमान दिएको हो । नेपालले भने आफ्नो भूबनोट सुहाउँदो एम १७ सिरिजका हेलिकोप्टर रुसबाट ल्याएको छ । जुन संंसारकै सबैभन्दा दह्रो र पहाडी भूगोलका लागि उत्कृष्ट हेलिकोप्टर हो । यसैका दलालहरू हिजोदेखि नेपाल यात्रामा छन् ।

श्रीलंकामा पनि सरकारी र विद्रोही दुवै पक्षले एके ४७ राइफल प्रयोगमा ल्याएको पाइन्छ । अर्कोतर्फ कोरोना कालको बेला रुसबाट हेलिकप्टरका पार्टपुर्जा आयात हुन नसकेपछि बंगलादेशबाट ल्याइएको थियो । सेनाकै प्लेन ढाका गएर ती पार्टपुर्जा ल्याइएको हो । डेढ वर्षअघि हेलिकप्टरको पार्टपुर्जा स्टकमा रहेकाले शोधभर्ना गर्ने शर्तमा बंगलादेशबाट ल्याइएको थियो । र, यतिखेर उसले ती पार्टपुर्जा फिर्ता गर्न ताकेता लगाएको अवस्था छ । तर, रुस र युक्रेनबीचको युद्धले गर्दा डलर सटही गर्न अप्ठ्यारो भएकाले गर्दा समस्या भएको छ । रुसी बैंकसँगको कारोबारमा अमेरिका र युरोपले अन्तर्राष्ट्रिय नाकाबन्दी लगाएका छन् ।