प्रहरीले कुटेर मारेपछि किटानी जाहेरी (अडियोसहित)
सुर्खेतको वीरेन्द्रनगरमा प्रहरीको कुटाईबाट ज्यान गएको भनिएका कृष्ण हमाल मिनीका आफन्तले सुब्बाकुना प्रहरी इञ्चार्ज सई शेरसिंह धामीविरुद्ध किटानी जाहेरी दर्ता गरेका छन् ।
मृतक हमालका आफन्त तिलागुफा नगरपालिका–३ का ५४ वर्षीय हिराचन्द्र हमालले जिल्ला प्रहरी कार्यालय सुर्खेतमा धामीविरुध्द कर्तव्य ज्यानसम्बन्धी कसुरमा जाहेरी दर्ता गराएका हुन् ।
अस्ति साँझ वीरेन्द्रनगर भित्रिने प्रवेशद्वार सुब्बाकुनामा हमाल सवार ट्रकलाई नियन्त्रणमा लिएर कुटपिट गरेपछि उनको मृत्यु भएको परिवारको आरोप छ ।
यता जिल्ला प्रहरी कार्यालय सुर्खेतले किटानी जाहेरी परेकाले अब कानुनी प्रक्रियाअनुसार अनुसन्धान थालिने जनाएको छ ।
प्रहरीको कुटाईबाट वीरेन्द्रनगरमा कालीकोटका एक युवकको ज्यान गएको भनिएको यस घटनाबारे सत्यतथ्य छानबिन गर्न समिति पनि गठन भएको छ । जिल्ला प्रशासन कार्यालय सुर्खेतले सहायक प्रमुख जिल्ला अधिकारी ईश्वरीप्रसाद पाण्डेको संयोजकत्वमा चार सदस्यीय छानबिन समिति बनाएको हो ।
समितिलाई घटनाको सत्यतथ्य छानबिन गरी तीन दिनभित्र प्रतिवेदन बुझाउन निर्देशन दिइएको छ । प्रशासनले घटनालाई लिएर जिल्लामा हुन सक्ने सम्भावित विरोध प्रदर्शनलाई नियन्त्रण गर्न पूर्व आदेश दिएको छ ।
प्रमुख जिल्ला अधिकारी खगेन्द्रप्रसाद रिजालको अध्यक्षमा बसेको सुरक्षा निकायको बैठकले मृतकका आफन्तलाई पनि छानविनको वातावरण बनाउन आग्रह गरेको छ ।
यसैबीच प्रहरी र मृतकका आफन्तसँग भएको सहमतिअनुसार आन्दोलनका कार्यक्रमहरु फिर्ता गरिएको मृतकका काका कलमबहादुर हमालले जानकारी दिएका छन् ।
उनले दोषीलाई कारबाही र मृतकका परिवारलाई उचित क्षतिपूर्ति दिन माग गरेका छन् ।
टिप्पणीहरू