कानूनको आँखा छल्दै भागेर ढुक्कले घर बसेकाहरु धमाधम कर्यापझ्याप

अदालतको फैसला कार्यान्वयन गराउन खटिएको प्रहरीले फरार भनिएका तर आफ्नै घरमा बसिरहेका सात जनालाई पक्राउ गरेको छ ।

पक्राउ परेकाहरुमा उदयपुर त्रियुगा नगरपालिका २, खैजनपुरका ३० वर्षीय दिलिप चौधरी, ३३ वर्षीय राजिन चौधरी, ३५ वर्षीय वीरेन चौधरी, ३५ वर्षीय रिता चौधरी, ३२ वर्षीया पवित्रा चौधरी र ३४ वर्षीया दुर्गा चौधरी हुन् ।

उनीहरु सबैलाई प्रहरीले घरबाटै पक्राउ गरेर अदालतमा फैसला कार्यान्वयनको लागि बुझाएको हो । अदालतले विभिन्न समयमा गरेको फैसलाअनुसार सबैले जनही एक लाख ३६ हजार छ सय ७७ रुपैयाँको दरले आठ लाख २० हजार दुई रुपैया जरिवाना तिराउने फैसला गरेको थियो ।

तर उनीहरुले सो जरिवाना रकम बुझाएका थिएनन् । प्रहरीले विशेष सूचनाको आधारमा आज उनीहरुलाई पक्राउ गरेको हो । तर के अपराधमा उनीहरुलाई अदालतबाट उक्त जरिवाना भएको थियो भन्नेबारे प्रहरीले स्पष्ट पारेको छैन ।

यसैगरी आजै रामपुरठोक्सिला प्रहरीले लागुऔषध मुद्दामा कैद सजाय तोकिएर लुकिछिपि घरमै बस्दै आएका एक किशोरलाई पक्राउ गरेको छ ।

पक्राउ पर्नेमा बेलका नगरपालिका ७, मैनामैनीका १८ वर्षीय अशोक राई हुन । उनलाई उदयपुर अदालतले २०७७ फागुन २३ गते लागुऔषध मुद्दामा १०महिना १५ दिनको कैद फैसला सुनाएको थियो । तर उनी फैसलापछि फरार थिए ।

पक्राउ परेका सबैलाई आजै उदयपुर जिल्ला अदालतसमक्ष बुझाएको छ ।