छिमेकबाट अत्यन्त दुःखद् खबर, गोर्खाली नाताका जर्नेलको निधन

भारतमा आज दिउँसो भएको हेलिकोप्टर दुर्घटनामा सेनाका प्रथम तथा बहालरत चिफ अफ डिफेन्स स्टाफ (सिडिएस) विपिन रावतको निधन भएको छ । हेलिकोप्टरमा रहेका १३ जनाको निधन भएको खबर बाहिरिए पनि रावतको स्थानीय अस्पतालमा उपचार भइरहेको बताइएको थियो । तर, भर्खरै भारतीय वायु सेनाले उनको निधनको पुष्टि गरेको छ ।

आज दिउँसो सेनाको एउटा कार्यक्रममा सहभागि भएर नयाँ दिल्ली फर्कंदै गर्दा दक्षिण भारतको तमिलनाडुको कुन्नुरमा उनी चढेको हेलिकोप्टर दुर्घटनामा परेको हो । भारतीय वायुसेवाको एमआई १७ हेलिकोप्टर दुर्घटनामा रावतकी श्रीमतीसहित सबै १४ जनाको निधन भएको छ । घना जंगलमा दुर्घटनाग्रस्त हेलिकोप्टर जलेर ध्वस्त भएको छ । तीन जना घाइतेलाई नजिकैको अस्पतालमा लगिएको बताइएको थियो ।रावत दुई वर्षअघि बहालरत भारतीय सेनाध्यक्षबाट उक्त पदमा नियुक्त भएका थिए । प्रधानमन्त्री नरेन्द्र मोदीले सिडिएस पदको विशेष व्यवस्था गरेर सिर्जना गरिएको नयाँ पदमा रावतलाई नियुक्त गर्नुभएको थियो । उनले भारतीय रक्षा मन्त्रालय र जल, स्थल र वायु सेनाको बीचमा संयोजकको भूमिका निभाएका थिए ।

त्यसअघि पनि रावतलाई तीन जना वरिष्ठ लेफ्टिनेन्ट जनरललाई उछिनेर सेनापति बनाइएको थियो । विशेष सुरक्षा रणनीतिकारको रुपमा अघि सारिएका उनको निधनबाट प्रधानमन्त्री मोदीलाई ठूलो घाटा पुगेको छ ।

उनले तीन वर्ष स्थल सेनाध्यक्ष र दुई वर्ष सीडीएसको जिम्मेवारी वहन गरेका थिए । एक वर्ष कार्यकाल बाँकी छँदै उनको आज दुःखद् निधन भएको छ । भारतीय सेनाका अनुसार उनी आफ्नो जिम्मेवारी फत्ते गर्न राति ९ बजेसम्म कार्यालयमा बसेर काम गर्थे ।