गंगालालमा कोरोनाको नक्कली रिपोर्ट, टेक्निसियन बर्खास्त
काठमाडौंको बाँसबारीस्थित शहीद गंगालाल हृदयरोग केन्द्रमा सर्वसाधारणसँग रकम असुलेर कोभिड–१९ को नक्कली पीसीआर रिपोर्ट बनाउने कर्मचारीलाई अस्पतालले बर्खास्त गरेको छ । उक्त घटना पुष्टि भएपछि अस्पतालका वरिष्ठ ल्याब टेक्निसियनलाई सेवाबाटै बर्खास्त गरिएको हो ।
केन्द्रका प्रयोगशाला प्रमुखसमेत रहेका विनोदकुमार यादवले पिसिआर रिपोर्ट नक्कली बनाउने गरेको पाइएपछि उनलाई हटाइएको बताइएको छ । उनले अक्षम्य अपराध गरेकाले भविष्यमा समेत उक्त सेवाका लागि अयोग्य ठहर गरी यादवलाई निकाला गरिएको हो ।
उनले पीसीआर परीक्षणको नक्कली कागजात बनाउने, केन्द्रको लेटरप्याड दुरुपयोग गर्ने, बिनापरीक्षण रिपोर्ट निकाल्ने गरेको अनुसन्धानबाट खुलेको छ ।
अस्पतालको छानबिन समितिद्वारा गरिएको अध्ययनमा यादवले विदेश जाने व्यक्तिहरूलाई परीक्षणका क्रममा कोभिड संक्रमण देखिए पनि रकम लिएर रिर्पोटलाई नेगेटिभ बनाएका थिए ।
हालसम्म उनले ९० जनाभन्दा बढी व्यक्तिको नक्कली रिपोर्ट बनाएको पुष्टि भएको छ ।
टिप्पणीहरू