विद्यार्थीले प्रमाणपत्र पाउन कम्तिमा ‘डी’ ग्रेड ल्याउनै पर्ने

सरकारले गठन गरेको अध्ययन कार्यदलले विद्यालय तहमा उतीर्ण हुन जुनसुकै विषयमा न्यूनतम ३५ प्रतिशत अंक ल्याउनुपर्ने नीति बनाउन सिफारिस गरेको छ ।

‘नेपालको विद्यालय शिक्षा पद्धतिमा अक्षराङ्कन पद्धतिसम्बन्धी अध्ययन कार्यदल’ ले विद्यालय तहमा सिकाइ उपलब्धीको न्यूनतम प्रतिशत आन्तरिक वा प्रयोगात्मक परीक्षामा ४० र आवधिक वा सैद्धान्तिकमा ३५ हुने गरी अभ्यास गर्न प्रतिवेदनमा सुझाव दिइएको छ ।

ग्रेडिङ सिस्टमले सिकाइको गुणस्तर खस्किँदै गएपछि कार्यदलले विद्यालय तहमा न्यूनतम अंक ल्याउनुपर्ने व्यवस्थालाई जोड दिएको हो । हाल परीक्षा र प्रयोगात्मकको अंक जोडेर ग्रेडिङ गर्ने गरिएको छ । यसो गर्दा एउटै पक्षमा मात्र बढी अंक ल्याउदा पनि विद्यार्थी उत्तीर्ण हुन्छन् ।

कार्यदलले कक्षा ८, १० र १२ मा न्यूनतम ग्रेड पूरा गरेपछि मात्र मूल प्रमणपत्र दिन स सिफारिस गरेको छ । न्यूनतम ३५ अंक तोकिएपछि सोभन्दा कम सिकाइ उपलब्धि प्राप्त गर्नेहरूको ग्रेडसिटमा भने ‘कम्प्लिटेड’ उल्लेख नगर्नसमेत उसले सुझाव दिएको छ ।

आन्तरिक र प्रयोत्गात्मक परीक्षामा ‘सी’ वा ‘डी’ ग्रेड नल्याएसम्म प्रमाणपत्र नदिन उपयुक्त हुने भने कार्यदलको भनाइ छ । तर, दिनै परेको खण्डमा ननग्रेड हालेर प्रमाणपत्र दिनुपर्ने भनिएको छ ।

ननग्रेड प्राप्त विद्यार्थीले प्राविधिक तथा व्यवसायिक तालिम शिक्षातर्फका प्रिडिप्लोमा र सो सरहका कोर्समा भर्ना भई अध्ययन गर्न पाउने छन् ।