२४ वर्षे ठिटोले १४ वर्षीयालाई प्रेमको नाटक गरेर भारत पुर्याए

१४ वर्षीया बालिकालाई प्रेमको नाटक गरेर पर्वतका एक जना २४ वर्षे युवाले बेचबिखन गर्ने उद्देश्यसहित नेपाल–भारतको सिमाना कटाएर जोगबनी पुर्याएका छन् ।

मानव बेचबिखन तथा ओसारपसारमा संलग्न रहेको अभियोगमा अहिले ती युवा पक्राउ परेका छन् । बालिका बेचबिखनको आरोप लागेका पवर्तको मोदी गाउँपालिका ५ बस्ने २४ वर्षीय सूर्यबहादुर भण्डारीलाई प्रहरीले समातेको हो ।

१४ वर्षीया किशोरीलाई असोज ६ गते भण्डारीले प्रेमको नाटक र अन्य प्रलोभनमा पारी नेपाल भारत सिमानाको भारतीय शहर जोगबनी पुर्याएका थिए । तर प्रहरीले उनलाई पर्वतको कुश्मा नगरपालिका ६, शिवालय चोकबाट पक्राउ गरेको छ ।

भण्डारीसँगै अरुको पनि संलग्नता रहेको आशंका भएकाले अरुको खोजी भइरहेको जिल्ला प्रहरी कार्यालयका निरिक्षक राजेन्द्र अधिकारीले बताउनुभयो । हाल ती किशोरीलाई अभिभावकको जिम्मा लगाइएको पनि अधिकारीले जानकारी दिनुभएको छ ।

भण्डारीविरुध्द मानव बेचबिखन तथा ओसारपोसार मुद्दामा जिल्ला अदालतबाट १० दिन म्याद थपेर अनुसन्धान भइरहेको छ ।