पहिले बैंकबाट ऋण झिक्न लगाइन्, अनि भारत लगेर पतिलाई मारिन्
सिरहाको गोलबजार नगरपालिका–४,निपनिया कुटीटोल निवासी ३९ वर्षीय दुखरन महराको हत्या आरोपमा उनकी ३८ वर्षीया श्रीमती हरिहरदेवी महरालाई प्रहरीले पक्राउ गरेको छ ।
दुखरनको गत भदौ १८ गते भारतको बिहार जयनगरस्थित बरही गाउँमा घाँटी रेटी हत्या गरेको अवस्थामा शव फेला परेको थियो । भारतीय भूमिमा दुखरनको शव फेला परेपछि उताका प्रहरीले नेपाल प्रहरीसँगको समन्वयमा अनुसन्धान अघि बढाएको थियो ।
घटनामा संलग्नमध्येका एक जना हरिहरदेवीका प्रेमी २६ वर्षीय भारतीय नागरिक मुकेश यादवलाई उतैको हिरासतमा राखेर अनुसन्धान गरिरहेको जिल्ला प्रहरी कार्यालयका प्रवक्ता डीएसपी सुभाष बुढाथोकीले जानकारी दिनुभएको छ । मुकेश र हरिहरदेवी २ वर्षदेखि प्रेममा रहेको बताइन्छ ।
डीएसपी सुभाषका अनुसार हरिहरदेवीले नेपालमा मोटरसाइकल किन्न महंगो हुने भएकाले घर चलाउन भन्दै झिकिएको ६० हजार रुपैयाँ ऋण खोसेर दुखरन भारतमा मोटरसाइकल किन्न गएको बताएकी छन् । तर,अनुसन्धानका क्रममा हरिहरदेवीले नै मुकेशलाई श्रीमानको हत्या गराउन गोलबजारकै एक लघुवित्त संस्थाबाट उक्त ऋण लिएको खुल्न आएको छ ।
सो ऋण निकाल्न हरिहरदेवीले श्रीमान दुखरनलाई घर चलाउने पैसा नभएको भन्दै फकाएको समेत पुष्टि भएको छ । ऋण निकालेको भोलिपल्ट श्रीमतीले आफू बिरामी भएको नाटक गर्दै उपचारका लागि दुखरनसँग भारत गएको र श्रीमानको हत्यापछि मात्र नेपाल फर्किएको प्रमाणहरु प्रहरीले पत्ता लगाएको हो ।
टिप्पणीहरू