जहाज चलाउने साहुहरुले तिरेनन् १० करोड

मुलकका मै हुँ भन्ने व्यवसायीले आफ्नो नाममा रहेको एअरलाइन्सको बक्यौता नतिरेपछि नेपाल नागरिक उड्डयन प्राधिकरणले ३० दिने सूचना जारी गरेको छ ।

तेस्रो पटक भदौ १२ गते प्रकाशित सूचनामा प्राधिकरणले सञ्चालनमा नरहेका एअरलाइन्सहरुको ९ करोड ९६ लाख ७६ हजार बक्यौता रकम बुझाउन ९ वटा कम्पनी र २ दर्जनभन्दा बढी सञ्चालकको नाम प्रकाशित गरेको हो ।

बक्यौता रकम बाँकी राखेका कतिपयलाई त्यहि प्राधिकरणले नयाँ एअरलाइन्सको सञ्चालक बन्नसमेत छुट दिएको थियो । तर पछिल्लो पटक प्रकाशित सूचनामा बक्यौता भुक्तानी नगर्ने कम्पनीका सञ्चालकहरुलाई कालोसूचिमा राख्ने चेतावनी भने दिइएको छ ।

सरकारलाई बक्यौता तिर्न बाँकी सञ्चालकमा यसअघि नै निधन भइसकेकादेखि विदेशी नागरिकसम्म देखिन्छन् । कर्णाली एअरका नारायणसिंह पुन र स्काइलाइन एअरवेजका आङछिरिङ शेर्पाको निधन भइसकेको छ । एअर काष्ठमण्डपका हमाद अली जावोर कतारी नागरिक हुन् ।प्राधिकरणको सूचनाअनुसार सञ्चालक मुकुन्दभक्त श्रेष्ठ, दिपमणि राजभण्डारी,दिपकराज कोइराला,रविन्द्र श्रेष्ठ,मृगेन्द्र जोशी र रविचन्द्रमान श्रेष्ठको नाममा ४ करोड ७२ लाख २५ हजार ३ सय ४३ रुपैयाँ बक्यौता देखिएको छ ।

त्यसैगरी शिवानी एअरका मणिन्द्रलाल रञ्जितकारको नाममा ५५ लाख ५१ हजार ५३ रुपैयाँ र अल्पाइन एअरका नाममा ७२ हजार ७ सय २८ रुपैयाँ बक्यौता छ । जसका सञ्चालकहरुमा क्याप्टेन प्रदीपमान सिंह, सुरेन्द्रबहादुर मल्ल र दिवङ्गत महेश्वरभक्त श्रेष्ठ छन् ।

गोरखा एअरका सञ्चालक प्रज्वल श्रेष्ठ र डा. उज्वल श्रेष्ठको नाममा उठ्न बाँकी रकम २० लाख ३५ हजार २९ रुपैयाँ रहेको प्राधिकरणले सार्वजनिक गरेको छ । कर्णाली एअरका स्व.नारायणसिंह पुन र सविना राई पुनको नाममा १७ लाख ४६ हजार ३ सय रुपैयाँ बक्यौता रहेको देखिन्छ ।

प्रज्ञानसमशेर जंगबहादुर राणा, सिध्दिदा राणा र शिवेद्रबहादुर बस्नेतको नाममा रहेको माउण्टेन एअरले पनि १२ लाख ७३ हजार ६ सय ९४ तिर्नु पर्ने देखिन्छ । कस्मिक एअरका रविन्द्रप्रसाद प्रधानको नाममा ३ करोड ४७ लाख ५८ हजार ७० रुपैयाँ बाँकी छ ।

स्काइलाइन एअरवेजका ५ जना सञ्चालकले १५ लाख ५० हजार ४ सय तिर्न बाँकी छ । स्व. आङछिरिङ शेर्पा,पेम्बा छिरिङ शेर्पा,मिङ्मा दोर्जे शेर्पा,तेन्जिङ नोर्बु शेर्पा र यादव खरेलको नाममा उक्त बक्यौता रकम देखिएको हो ।

एअर काष्ठमण्डपका प्रज्वल श्रेष्ठ, उज्जवल श्रेष्ठ र हमाद अली जावोरले प्राधिकरणलाई ७ लाख ३८ हजार ४ सय ४७ रुपैयाँ तिर्न बाँकी रकम देखिएको हो ।

विगतमा बक्यौता रकम बाँकी राखेका कतिपयलाई त्यहि प्राधिकरणले नयाँ एअरलाइन्सको सञ्चालक बन्नसमेत छुट दिएको थियो । तर पछिल्लो पटक प्रकाशित सूचनामा बक्यौता भुक्तानी नगर्ने कम्पनीका सञ्चालकहरुलाई कालोसूचिमा राख्ने चेतावनी भने दिइएको छ ।