किर्तिपुरमा छिमेकीद्वारा मिर्गौलाका वृद्ध बिरामीलाई घरमै पसेर कुटपिट, ६२ वर्षीया वृद्धाको टाउकोमा ईंटा प्रहार

किर्तिपुरमा एक छिमेकी युवाले दुई जेष्ठ नागरिकमाथि निर्घात कुटपिट गरेका छन् । किर्तिपुर नगरपालिका–५ का ६९ वर्षीय नेत्रप्रसाद खनाल र उनकी ६२ वर्षीया श्रीमती सरस्वती खनाललाई छिमेकी ३५ वर्षीय राधेश्याम विष्टले आज बिहान घरमै गएर निर्घात कुटपिट गरेका हुन् ।

कुटपिटबाट मिर्गौलाका बिरामी नेत्रप्रसादको डाइलायसिस गर्दा प्रयोग हुने नाडीमा लगाइएको फिस्टुला भाँचिएको छ भने सरस्वतीको टाउको फुटेको छ ।

स्थानीयका अनुसार यसअघि पनि खनाल परिवारलाई ज्यान मार्ने धम्की दिँदै आएका विष्टले आज बिहान साढे ५ बजे एक्कासी उनीहरुमाथि सांघातिक आक्रमण गरेका हुन् । विष्टले घरको गेट खोलेर तथानाम गाली गर्दै वृद्ध दम्पतिमाथि इट्टा र ढुंगाले लगातार आक्रमण गरेको एक जना प्रत्यक्षदर्शीले बताए । वृद्ध दम्पति बिहान नियमित डायलासिसको लागि अस्पताल जाने तयारी गर्दै थिए ।

वृद्धवृद्धामाथि कुटपिट गर्ने विष्टलाई महानगरीय प्रहरी वृत्त किर्तिपुरबाट गएको प्रहरी टोलीले दिउँसो पक्रेर हिरासतमा राखेको छ । घटनाबारे जानकारी दिँदै वृत्तका डिएसपीले विष्टविरुद्ध दुव्र्यवहारको मुद्दा दर्ता गरिएको र कानुनअनुसार कारबाही हुने बताउनुभएको छ ।

पीडित पक्षले भने पहुँचका आधारमा घटना सामसुम पार्ने र विष्टलाई छुटाउने प्रयास भइरहेको भन्दै आशंका गरेको छ । मुद्दा दर्ता नगर्न र टोलमै मिलापत्र गर्न वडासदस्य दिपेन्द्र विष्टले समेत दबाब दिइरहेको पीडित पक्षले बताएको छ ।

जनआस्थाको सम्पर्कमा आएकी पिडीतकी छोरी सम्झना खनालले रुँदै भनिन्, ‘आज बुबाको डायलासिस थियो, तर फिस्टुला भाँचिएको कारण अस्पतालले गरेन । रातभरीमा बुबाको हालत के हुने हो थाहा छैन । अब बुबाको छातिमा नयाँ फिस्टुला बनाउनुपर्ने चिकित्सकले बताएको उल्लेख गरिन् । जनप्रतिनिधि समेतले टोलमै मिलापत्र गर्नुपर्छ भनेर दबाब दिइरहेका छन् ।’

विगतमा पनि धेरै पटक धम्की दिँदै आएका विष्टले आज कल्पनै गर्न नसकिने घटना गरेको भन्दै उनले कानुनअनुसार कारबाही हुनुपर्ने बताइन् । आफूहरुले कुनै गल्ति नगरेको तर उपत्यका बाहिरबाट आएको परिवार भनेर विष्टले पटक–पटक होच्याउने, गालीगलौज गर्ने र अपशब्द बोल्ने गरेको बताइन् । ‘यसअघि पनि बेलाबेलामा ज्यान मार्ने धम्कि दिने गरेका थिए । तर, योस्तरको अमानवीय हर्कत् देखाउलान् भन्ने लागेको थिएन’, उनले भनिन् ।

सम्झनाका अनुसार लामो समयदेखिका मिर्गौलाका बिरामी उनका बुबा नेत्रप्रसादको सुमेरु अस्पतालमा डायलासिस हुँदै आएको छ । छिमेकीबाटै आमाबुबा कुटिएको खबर सुनेपछि चितवनमा रहेकी उनी आजै काठमाडौँ आइपुगेकी हुन् ।