वामदेव अनुपस्थित,भीमको आग्रह ‘बैठक रोक्नोस्’,ओलीको जवाफ, ‘ल बैठक अघि बढ्यो’

आज बिहान बसेको एमाले संस्थापन पक्षको स्थायी समिति बैठकमा उपाध्यक्ष वामदेव गौतम जानुभएन । पार्टी एकतालाई अघि बढाउने प्रक्रिया अघि बढेकोमा उत्साहित हुनुभएका गौतम अघिल्लो पटक बालुवाटारमा आयोजित बैठकमा भने जानुभएको थियो ।

ललितपुरको च्यासलस्थित तुल्सीलाल स्मृति प्रतिष्ठानमा आज बसेको बैठकमा वरिष्ठ नेता माधवकुमार नेपालपक्षीय नेताहरुमध्ये कार्यदलमा रहनुभएका स्थायी समिति सदस्यहरु पुग्नुभएको हो । पार्टी एकतालाई अघि बढाउन बैठक एकपक्षीय ढंगले अघि नबढाइयोस् भन्दै उपाध्यक्ष भीम रावलले प्रारम्भमै उठेर एकता अभियान,त्यसको मर्म र हालसम्मको प्रगतिवारे बोल्नुभएको थियो ।

“आज संसदीय दलको बैठकमा ओलीनिकटस्थ माननीयहरुमध्ये करिव ७० जनाको उपस्थिति थियो । ओली शक्तिमा छउञ्जेल ठेलमठेल गरेर बैठकमा हुर्रिनेहरु सत्ता विमुख भएको दुई दिनमै थकित देखिनु शुभ लक्षण नभएको बालकाेटतिर समेत टिप्पणी हुन थालेको छ ।”

रावलले झण्डै १२ मीनेटजति कार्यदलमा एक खेमाको संयोजक र पार्टी उपाध्यक्षको हैसियतमा थप तयारीनिम्ति १-२ दिन बैठक रोक्दा उपयुक्त हुने सुझाव राख्नुभएको थियो । अध्यक्ष केपी शर्मा ओलीले उहाँको भनाइ सुनेपछि अन्तमा कुनै जवाफ नदिएर ‘ल बैठक अघि बढ्यो’ भन्नुभयो । त्यसो भन्नुको अर्थ तिमीहरु जान सक्छौ,यताको कामकारबाही अघि बढ्छ भन्ने रहेको सहभागी एक जना नेताले बताउनुभएको छ ।

त्यसपछि पार्टी एकतानिम्ति अधिकतम प्रयत्नरत नेपालपक्षीय नेताहरुले मुखामुख गरेर बैठक कक्षबाट बाहिरिँदा अध्यक्षले रोक्नको लागि कुनै शब्द खर्चनुभएन । स्थायी समितिको एकपक्षीय बैठकमा उहाँ निकै आक्रामक ढंगले प्रस्तुत हुनुभएको थियो ।

“त्यसो भन्नुको अर्थ तिमीहरु जान सक्छौ,यताको कामकारबाही अघि बढ्छ भन्ने रहेको सहभागी एक जना नेताले बताउनुभएको छ ।”

त्यसपछि आजै दिउँसो संसद भवनमा भएको एमाले संसदीय दलको बैठकमा ओलीले देउवा सरकारले अध्यादेश ल्याएर आफ्नो पार्टी फुटाइदिनेसम्मको चिन्ता व्यक्त गर्नुभएको छ । जबकि उहाँले अघिल्लो वर्षको बैशाखमा अरुको दल र आवश्यकता परे आफ्नै दल फुटाउन सजिलो प्रावधानसहितको अध्यादेश ल्याउन खोज्नुभएको थियो । त्यसै सिलसिलामा तराईबाट मधेसी साँसदहरु अपहरित भए भने संघीय समाजवादी पार्टी र राजपालाई त्यही अध्यादेशले एकीकृत बनाइदियो । नयाँ सरकारले अध्यादेश ल्याएर आफ्नो पार्टी फुटाइदिने त्रासमा रहनुभएका एमाले अध्यक्षले त्यसलाई रोक्न किन चाहनुभएन त्यो चाहिँ बुझ्न सकिएको छैन ।

“पार्टी एकता पक्षधर नेपालपक्षीय नेताहरुले मुखामुख गरेर बैठक कक्षबाट बाहिरिँदा अध्यक्षले रोक्नको लागि कुनै शब्द खर्चनुभएन ।”

आज संसदीय दलको बैठकमा ओलीनिकटस्थ माननीयहरुमध्ये करिव ७० जनाको उपस्थिति थियो । ओली शक्तिमा छउञ्जेल ठेलमठेल गरेर बैठकमा हुर्रिनेहरु सत्ता विमुख भएको दुई दिनमै थकित देखिनु शुभ लक्षण नभएको बालकाेटतिर समेत टिप्पणी हुन थालेको छ ।