अरु नै देशमा लगेरसमेत नेपाली युवती बिक्री

नेपाली महिलालाई भारत हुँदै कम्बोडिया पुर्याएर बेचबिखन गर्ने कार्यमा संलग्न रहेको अभियोगमा धनकुटा सहिदभूमि गाउँपालिका–२ का ३७ वर्षीय किसान राई पक्राउ परेका छन् ।

फेसबुकबाट चिनजानपश्चात कन्स्ट्रक्सन तथा व्यापारको काममा रोजगारीको ग्यारेण्टी हुनेगरी ४ लाख ५० हजार रुपैयाँ भीसा खर्च लिएर कम्बोडिया लगी बेचेको अभियोगमा राई पक्राउ परेका हुन् । उनले महिलाहरुलाई खाने,बस्ने खर्च बाहेक नगद १ लाख रुपैयाँ मासिक कमाइ हुने भएकाले प्रत्येकसँग ४ लाख ५० हजार रुपैयाँ लिएको बताइएको छ ।

उनले भारत,म्यानमार,थाइल्याण्ड हुँदै कम्बोडिया लगेर चिनियाँहरु बस्ने घरमा खाना बनाउने र घर सफा गर्ने भन्दै पुर्याएका थिए । त्यसपछि सोही घरमा झुक्याएर यौनदासीको रुपमा काम गर्नेगरी पीडितलाई बेचबिखन गरेको जाहेरीको आधारमा प्रहरी प्रधान कार्यालय मानव बेचबिखन अनुसन्धान ब्यूरो, बबरमहलबाट खटिएको टोलीले राईलाई उनकै घरबाट पक्राउ गरेको हो ।

साथै अभियुक्त राई समेतले अन्य ४५ जना नेपाली महिला तथा पुरुषलाई विभिन्न बाटो हुँदै अवैध रुपमा कम्बोडिया लगी अलपत्र पारेको उजुरी वैदेशिक रोजगार विभाग बुद्धनगरमा परेको छ ।