निषेधाज्ञा उल्लंघन गर्ने २७ सय बढी सवारी साधन प्रहरी नियन्त्रणमा

विभिन्न जिल्लामा लागू गरिएको निषेधाज्ञा कार्यान्वयनको सिलसिलामा पछिल्लो २४ घण्टामा निषेधाज्ञा उल्लंघन गर्ने २ हजार ७ सय ४६ वटा सवारी साधनलाई प्रहरीले नियन्त्रणमा लिएको छ ।

जसमध्ये ७ सय ९४ वटा चार पाङ्ग्रे र १ हजार ९ सय ५२ वटा मोटरसाइकल रहेका छन् । नियन्त्रणमा लिएका सवारी साधनहरुलाई आवश्यक सोधपुछपछि छाडिएको थियो ।

नेपाल प्रहरीद्वारा सञ्चालित ‘तपाईंको मास्क खोई ?’ कार्यक्रमअन्तर्गत पछिल्लो २४ घण्टामा १ सय ५६ जनालाई निःशुल्क मास्क समेत वितरण गरिएको छ । उक्त कार्यक्रममा हालसम्म ४ लाख ५६ हजार ४ सय ७१ जनालाई निःशुल्क मास्क वितरण गरिएको बताइएको छ ।

कोभिड–१९ रोकथाम तथा नियन्त्रणका लागि स्थानीय प्रशासनद्वारा जारी निषेधाज्ञा उल्लंघन गर्ने १ सय ९३ जनालाई कोभिड–१९ संकट व्यवस्थापन अध्यादेश, २०७८ बमोजिम १९ हजार ३ सय रुपैयाँ जरिवाना समेत गरिएको छ । सो क्रममा १ हजार ८ सय ११ जनालाई सम्झाई बुझाई छाडिएको छ ।

यसबीचमा देशभर सञ्चालित माइकिङ, प्लेकार्ड, पर्चापम्प्लेट वितरणसहितका ५६ वटा सचेतनामूलक कार्यक्रमअन्तर्गत ४ हजार ६ सय ५६ जनालाई सचेत गराइएको छ ।

नेपाल प्रहरीले अन्य सुरक्षा निकायलगायतका सरोकारवालाहरूसँग आवश्यक समन्वय, सहकार्य गरी निषेधाज्ञाको अनुगमनलाई समेत तीब्रता दिएको बताइएको छ ।