निषेधाज्ञा लम्बिएपछि मजदुरहरू बिचल्लीमा,सडकमै खाना वितरण

निषेधाज्ञाको १४ औं दिन संघीय राजधानी काठमाण्डौमा ज्याला मजदुरी गरेर दैनिक जीवन गुजारा गर्दै आएकाहरू ठूलो समस्यामा परेका छन् ।

केही दिनका लागि आफूले कमाएको एकाध रकमले दुई छाकको जोहो गर्दै आएकाहरू निषेधाज्ञा लम्बिँदै गएपछि समस्यामा परेका हुन् ।

यसरी साँझ बिहान खाना खानसमेत धौ धौ परेकालाई विभिन्न संघ संस्थाले सडकमै खुवाउन थालेका छन् ।

कोभिड १९ को पहिलो लहरको केही समय टुँडिखेलमा खाना खुवाइएको थियो । महानगरले उनीहरूलाई त्यहाँबाट हटाएपछि विभिन्न पार्टी प्यालेसहरूमा भेला पारेर खाना खुवाउने गरिएको थियो । अहिले भने बाटोमा नै खुवाउने र खानेहरू देखिएका छन् ।

यसैबीच,निषेधाज्ञाको १४ औं दिनसम्म आइपुग्दा काठमाडौं उपत्यकाका तीन वटै जिल्लामा प्रहरीले चेकजाँचमा कडाई गरे पनि सडकमा दुई पाङग्रे र चार पाङग्रे सवारी साधन सञ्चालनमा खासै कमि देखिएको छैन ।

अघिल्ला दिनहरूमा झैँ सवारी साधन सञ्चालनमा आएको देखिन्छ । सवारी अनुमति नभएका र विना काम हिँड्नेहरूलाई प्रहरीले नियन्त्रणमा लिएर होल्डिङ सेन्टरमा राख्ने गरेको छ । कतिपयलाई १ सय रुपैयाँ जरिवानासमेत गर्न थालेको बताइन्छ ।