निषेधाज्ञामा पनि उपत्यका छिर्नेको ताँती,१ हजार बढी सवारी होल्डमा

कोरोनाको बढ्दो महामारीलाई मध्यनजर गर्दै सरकारले बैशाख मसान्तसम्म उपत्यकालगायतका जिल्लाहरूमा निषेधाज्ञा जारी गरेको छ । निषेधाज्ञाको बेला पनि उपत्यकामा सवारी साधनको चाप देखिएपछि आइतबारदेखि थप कडाइ गर्न थालिएको छ ।

सडकमा सवारी साधनको चाप बढेपछि स्थानीय प्रशासनले आजदेखि थप कडाइ गर्ने भने पनि प्रभावकारी कार्यान्वयन भने हुन सकेको छैन । आज पनि निषेधाज्ञा उल्लङ्घन गरी सडकमा निस्किएका सवारीसाधन कारबाहीमा परेका छन् । दिउँसो १ बजेसम्म निषेधाज्ञा उल्लङ्घन गर्ने १ हजार ५८ सवारीसाधनलाई होल्डमा राखिएको प्रहरीले जनाएको छ ।

त्यस्तै,निषेधाज्ञाको समयमा पनि उपत्यका भित्रिने सवारी साधनको संख्यासमेत लगातार बढिरहेको छ । महानगरीय ट्राफिक प्रहरीका अनुसार निषेधाज्ञाको चौथो दिन आज दिउँसोसम्म उपत्यका प्रवेश गर्ने र छाड्नेको संख्या उस्तै छ ।

आज ४ हजार ४ सय ६६ वटा सवारीसाधन उपत्यका भित्रिँदा ४ हजार ८ सय ९५ वटा बाहिरिएका छन् । त्यस्तै १० हजार २ सय ३१ जना आज दिउँसो १ बजेसम्ममा काठमाडौँ प्रवेश गरेका छन् भने सोही अवधिमा १५ हजार २ सय ७१ जनाले उपत्यका छाडेका छन् ।
उपत्यका भित्रिने र बाहिरिनेमा सरकारी नम्बर प्लेटका सवारी साधन पनि उल्लेख्य छन् । निषेधाज्ञामा अत्यावश्यक सवारीसाधन मात्र गुड्न दिने र त्यसको एक चौथाई सरकारी सवारी साधन चल्न पाउने निर्णय गरिएको छ । तर,सडकमा सरकारी नम्बर प्लेटका सवारी साधन प्रशस्त गुडेका छन् ।

प्रहरीका अनुसार आज दिउँसो १ बजेसम्म सरकारी नम्बर प्लेटका २ सय ६४ वटा दुई पाङ्ग्रे, २ सय ३४ वटा साना चार पाङ्ग्रे र ६० वटा ठूला सवारी साधन उपत्यका आउजाउ गरेका छन् ।