बालुवाटारको भोजले बैठकमा अवरोध

प्रधानमन्त्री निवास बालुवाटारको भोज खाने हतारोलाई थाती राख्दै जेलिएर बसेका थुप्रै समस्यालाई अब तीव्र गतिका साथ सुल्झाउने बाचासहित प्रधानन्यायाधीश विश्वम्भर श्रेष्ठ अगाडि बढेका छन् । आइतबार न्यायपरिषद्को बैठक चलिरहँदा बालुवाटारमा प्रतीक्षा थियो, प्रधानन्यायाधीशसहित सर्वोच्चका न्यायाधीश, कर्मचारी र परिवारका सदस्यहरूको ।

न्यायपरिषद्को बैठकमा चाहिँ सर्वोच्चमा एक वर्षदेखि हाजिर भएर बसेका, तर काम गर्न नपाएका न्यायाधीश विनोद शर्मालाई नियुक्तिका लागि सिफारिस गरिँदै थियो । सर्वोच्चकै लागि सिफारिस भएर संसदीय सुनुवाई नभएका कारण बहाल नभएका डिएन पराजुली, नीता गौतम दीक्षितहरूको हकमा भने आइतबारको बैठकले केही निर्णय गरेन । यसअघिका प्रधानन्यायाधीश हरिकृष्ण कार्कीको कार्यकालभरि विभिन्न बखेडा झिक्दै कानुनमन्त्रीले अड्काइदिँदा न्यायाधीश नियुक्ति, सरुवा र प्रशासनिक काम अस्तव्यस्त हुन पुगेको थियो । तर, अब १५ दिनभित्र सबै काम सिध्याउने गरी न्यायपरिषद् साँझ अबेरसम्म बस्ने गरेको बताइन्छ ।

आइतबारको बैठकमा उच्च अदालतमा न्यायाधीश नियुक्ति, कानुन व्यवसायीमध्येबाट नियुक्त गर्ने प्रतिशत र मापदण्ड, न्यायाधीशको आचारसंहिताजस्ता विषयमा छलफल गर्दागर्दै साँझ परेको थियो । बालुवाटारमा त्यसै दिन प्रधानन्यायाधीशलाई भोज दिने कार्यक्रम थियो । यसरी पौने सात बजे बैठक सकियो । मन्त्री धनराज गुरुङले बालुवाटारको भोज खान भ्याएनन् । अरु नै बैठक छ भन्दै उनी बालुवाटार गएनन् । त्यहाँ सर्वोच्चका न्यायाधीश, कर्मचारी, न्यायाधीशका परिवारसहित ४०–५० जना थिए । 

उच्चमा न्यायाधीश ल्याउनेबारे सबैको सहमतिमा टुंग्याउने मान्यतामा प्रधानन्यायाधीश श्रेष्ठ अडिग छन् । नियुक्त भएपछि उनी बेञ्चमा नबसेर थाती रहेका कामहरू सुल्झाउनका निम्ति औपचारिक र अनौपचारिक कुराकानी गरिरहेका छन् ।