यस्तो छ, माओवादी अभियानका तीन लक्ष्य

सत्तारुढ नेकपा माओवादी केन्द्रले भोलिदेखि थाल्ने तीनमहिने विशेष अभियानका क्रममा कम्तीमा २५ लाख मतदातासँग प्रत्यक्ष भेटघाट गर्ने लक्ष्य तय गरेको छ । 

माओवादीले २५ लाख मतदातालाई भेटेर सुशासन, समृद्धि र सामाजिक न्यायका क्षेत्रमा सरकारले गरेका कामबारे जानकारी गराउने अभियानको लक्ष्य बनाइएको हो । 

संगठन सुधारका लागि ’जनतासँग माओवादी विशेष रुपान्तरण अभियान’ चलाउन लागेको माओवादीले सरकारले गरेका राम्रा कामको प्रचारप्रसार गर्न केन्द्रीय सदस्यहरुलाई खटाएर प्रत्येक घरमा पुग्ने योजना बनाएको छ । जसअन्तर्गत प्रधानमन्त्री एवम् पार्टी अध्यक्ष पुष्पकमल दाहाल प्रचण्डलेसमेत सातवटै प्रदेशका एक–एक वटा वडामा पुग्नेगरी कार्यक्रम बनाइएको छ । त्यस्तै, पदाधिकारीहरु पनि वडाका कार्यक्रममा सहभागी हुने छन् । 

माओवादीले पार्टी सदस्य बढाउने योजनासमेत बनाएको छ । सोही अनुसार पार्टी सदस्यता  नवीकरण र विस्तार गरि आठ लाख पुर्याउन पार्टी र जनसंगठनहरुलाई क्रियाशील गराउने अभियानको लक्ष्य बनाएको छ ।

त्यस्तै, आत्मनिर्भरता बढाउने उद्देश्यका साथ पार्टीको नेतृत्वमा रहेका स्थानीय सरकारहरुले कम्तीमा एक–एक वटा उत्पादन र उद्यमसँग सम्बन्धित कार्यक्रम शुरु गर्ने कुरालाई पनि यहि अभियानमा जोडेर माओवादीले लक्ष्य निर्धारण गरेको छ । संघीय सरकारले कृषि तथा वनमा आधारित साना उद्योग, उत्पादन र बजारीकरणको क्षेत्रमा सातवटै प्रदेशमा एक–एक वटा आयोजना सञ्चालनको सम्भाव्यता अध्ययन गर्ने पनि अभियानको लक्ष्य छ । 

अध्यक्ष प्रचण्डले भोलि बिहान ९ बजे पार्टी मुख्यालय पेरिडाँडाबाट देशभर एकैसाथ भर्चुअल माध्यमबाट अभियानको उद्घाटन गर्ने तयारी छ । त्यसपछि पदाधिकारीसहितका नेताहरु आ–आफ्नो तोकिएको वडाका कार्यक्रममा सहभागी हुने प्रवक्ता अग्निप्रसाद सापकोटाले जानकारी दिए ।