‘जनतासँग माओवादी विशेष अभियान’ मा प्रधानमन्त्रीलाई चन्द्रागिरी–२ घट्टेडाँडाको जिम्मेवारी

सत्तारुढ नेकपा माओवादी केन्द्रले ‘जनतासँग माओवादी विशेष अभियान’ को तयारी पूरा भएको जनाएको छ । भोलिबाट शुरु हुने तीनमहिने अभियानबारे जानकारी दिन पार्टी मुख्यालय पेरिसडाँडामा आयोजित पत्रकार सम्मेलनमा प्रवक्ता अग्निप्रसाद सापकोटाले तयारी पूरा भएको जानकारी दिएका हुन् । 

भोलि बिहान ९ बजे पार्टी मुख्यालयबाट भर्चुअल माध्यममा मुलुकभरका सबै वडामा एकैसाथ प्रधानमन्त्री तथा पार्टी अध्यक्ष पुष्पकमल दाहाल प्रचण्डले अभियानको उद्घाटन गर्ने जनाइएको छ । अभियानको तयारीका लागि केन्द्रीय सदस्यहरु यसअघि नै वडामा खटिएका छन् । 

त्यस्तै, अध्यक्ष प्रचण्डसहित पदाधिकारीहरुलाई पनि वडाको जिम्मेवारी तोकिएको प्रवक्ता सापकोटाले बताए । बिहान अध्यक्ष प्रचण्डले अभियानको उद्घाटन गरेपछि दिउँसो १ बजेबाट कार्यक्रम शुरु हुने छ । त्यसपछि पदाधिकारीहरु तोकिएका आ–आफ्ना वडामा पुग्नेछन् । 

प्रधानमन्त्री काठमाडौंको चन्द्रागिरी–२ स्थित घट्टेडाँडाको कार्यक्रममा सहभागी हुने जनाइएको छ । त्यस्तै, वरिष्ठ उपाध्यक्ष तथा गृहमन्त्री नारायकाजी श्रेष्ठ ललितपुर महानगरपालिका–२८, हरिसिद्धिमा खटिने प्रवक्ता सापकोटाले बताए । 

उपाध्यक्षत्रय कृष्णबहादुर महरा रोल्पाको सुनछहरी गाउँपालिका, अग्नि सापकोटा सिन्धुपाल्चोकको लिसंखुपाखर गाउँपालिका–३ र पम्फा भुसाललाई ललितपुर महानगरपालिका–२२ मा जिम्मेवारी तोकिएको छ । महासचिव देव गुरुङ लमजुङको सुन्दरबजार नगरपालिका–८ भोटेओडारको कार्यक्रममा सहभागी हुने बताइएको छ । 

त्यस्तै, उपमहासचिवहरु गिरिराजमणि पोखरेल गोकर्णेश्वर नगरपालिका–४ काठमाडौं, वर्षमान पुन काठमाडौँको गोंगबु र जनार्दन शर्मा चन्द्रागिरी–२ मा खटिने छन् । उपमहासचिव हरिबोल गजुरेल सिन्धुलीको कमलाइमाई नगरपालिका, शक्ति बस्नेत भेरी नगरपालिका–१, जाजरकोट र मातृका यादव सुर्खेतको वीरेन्द्रनगर नगरपालिका–१ को कार्यक्रममा सामेल हुनेछन् ।

सचिवहरु दिनानाथ शर्माले बाग्लुङ नगरपालिका–१२, चक्रपाणि खनालले विराटनगर महानगरपालिका–१८, देवेन्द्र पौडेलले पोखरा महानगरपालिका–२०, लीलामणि पोखरेलले बर्दिवास नगरपालिका र गणेश साहले काठमाडौं महानगरपालिका–१० को जिम्मा पाएका छन् । 

सचिव हितमान शाक्य रुकुमपूर्वको सिस्ने गाउँपालिका–६, डिलाराम आचार्य धनगढी उपमहानगरपालिका–१, हितराज पाण्डे आरुघाट–६, गोरखा र राम कार्की झापाको बुद्धशान्ति गाउँपालिकामा खटिनेछन् । कोषाध्यक्ष श्रीराम ढकालको जिमेवारी काठमाडौंको चन्द्रागिरि–२ मा परेको छ ।   

माओवादीको हालै सम्पन्न केन्द्रीय समिति बैठकले संगठन सुधारका लागि विशेष अभियान चलाउने निर्णय गरेको थियो । सोही अनुसार अभियानको तयारीका लागि केन्द्रीय नेताहरु वडा–वडामा पुगिसकेका छन् । पार्टी बनाउन मजबुत संगठन चाहिएकाले आफूहरु जनतामा जान लागेको प्रवक्ता सापकोटाले पत्रकार सम्मेलनमा सुनाए ।