चीनको कदमले भारतलाई सघाउ पुर्याएको भन्दै चिढियो जनमोर्चा
चित्रबहादुर केसी नेतृत्वको राष्ट्रिय जनमोर्चाले नेपालको राष्ट्रियतामाथि छिमेकी चीनले गम्भीर आँच पुर्याएको आरोप लगाएको छ । नेपालो भू-भागसमेत समेटेर चीनले नयाँ राजनीतिक नक्सा प्रकाशन गरेकोप्रति आपत्ति जनाउँदै जनमोर्चाले यस्तो प्रतिक्रिया दिएको हो ।
चीनले लिम्पियाधुरा, कालापानी र लिपुलेकसमेत समेटेर जारी गरेको नेपालको नयाँ चुच्चे नक्सालाई मान्यता नदिने चीनको व्यवहारप्रति जनमोर्चाले विरोधसमेत जनाएको छ । अध्यक्ष चित्रबहादुर केसीले चीनको उक्त कार्य नेपालको राष्ट्रियताविरुद्ध रहेको बताए ।
आज विज्ञप्ति जारी गर्दै उनले भारतको पोजिसनलाई घुमाउरो ढङ्गले चीनले समर्थन गरिरहेको पनि टिप्पणी गरेका छन् । त्यस्तै, नेपाल सरकारले चुच्चे नक्साको विषयमा प्रभावकारी ढङ्गबाट कुटनीतिक पहल नगरेर भारतको सामु आत्मसमर्पण गर्दै आएको उनको आरोप छ ।
विज्ञप्तिमा भनिएको छ,‘चीनले आफ्नो नक्सामा २०७७ जेठभन्दा अगाडिको नेपालको नक्सालाई राख्नु र विगतमा नेपाललाई जानकारी नै नदिई भारतसँग लिपुलेक नाकालाई चीन र भारतका बीचमा व्यापारिक नाकाको रुपमा विकास गर्नुले कालापानीको सवालमा चीनले समेत भारतको पोजिसनलाई घुमाउरो प्रकारले समर्थन गर्ने कार्यले नेपालको राष्ट्रियतामाथि आँच पुगेको छ । चीनको यो कार्य नेपालको राष्ट्रियताका विरुद्ध रहेको छ ।’
अध्यक्ष केसीले चीनले जारी गरेको नयाँ राजनीतिक नक्साको विषयमा तत्काल कुटनीतिक संवाद गर्न मागसमेत गरेका छन् । प्रधानमन्त्री पुष्पकमल दाहाल (प्रचण्ड) को आसन्न चीन भ्रमणको क्रममा यो विषय चिनियाँ पक्षसमक्ष उठाउन आवश्यक देखिएको उनको भनाई छ ।
तीन वर्षअघि अर्को छिमेकी भारतले कालापानी क्षेत्रको नेपाली भूभाग समेटेर नक्सा जारी गरेको थियो । त्यसविरुद्ध नेपालले २०७७ जेठ ३१ गते लिम्पियाधुरा, कालापानी र लिपुलेकसमेत समेटेर चुच्चे नक्सा जारी गरेको थियो । अगस्त २८ मा चीनले जारी गरेको नयाँ राजनीतिक नक्सामा उक्त चुच्चे भूभाग समेटिएको छ ।
टिप्पणीहरू