प्रधानमन्त्रीले भारतीय राष्ट्रपति, उपराष्ट्रपतिसँग पनि शिष्टाचार भेट गर्ने

प्रधानमन्त्री पुष्पकमल दाहाल प्रचण्डले भारत भ्रमणको क्रममा नयाँ दिल्लीमा राष्ट्रपति श्रीमती द्रौपदी मुर्मु, उपराष्ट्रपति जगदीप धनखरसँग पनि शिष्टाचार भेटवार्ता गर्नुहुने भएको छ । भारतीय प्रधानमन्त्री नरेन्द्र मोदीको निमन्त्रणमा प्रधानमन्त्री आगामी बुधबार चार दिने भारत भ्रमणमा जाने मिति तय भएको छ । 

परराष्ट्र मन्त्रालयले आज विज्ञप्ति जारी गरेर भ्रमण तालिका सार्वजनिक गर्दै उक्त कार्यक्रमबारे जानकारी दिएको हो ।

प्रधानमन्त्री प्रचण्डले नयाँ दिल्ली पुगेको भोलिपल्ट भारतीय समकक्षी नरेन्द्र मोदीसँग हैदरावाद हाउसमा वार्ता गर्नुहुनेछ । सोही दिन उहाँहरुले संयुक्त पत्रकार सम्मेलन गर्ने कार्यक्रम छ । 

त्यसलगत्तै  भारतीय प्रधानमन्त्री मोदीले प्रधानमन्त्री प्रचण्ड र नेपाली प्रतिनिधिमण्डलको सम्मानमा दिवाभोजको आयोजना गर्नुहुनेछ । उहाँले भारतीय उद्योगपति तथा व्यवसायीहरुसँग अन्तरक्रिया गर्ने र नेपाली राजदूतले आयोजना गर्ने स्वागत कार्यक्रममा सहभागी हुने बताइएको छ ।

शनिबार स्वदेश फर्कनुअघि प्रधानमन्त्री मध्य प्रदेशको उज्जैन र इन्दोर भ्रमणमा जानुहुनेछ ।