घुस्याहा हाकिमलाई उन्मुक्ति दिने विशेष अदालतको फैसलाविरुद्ध सर्वोच्चमा रिट

अख्तियार दुरुपयोग अनुसन्धान आयोगले तत्कालिन अध्यागमन विभागका अधिकृत कमलप्रसाद पराजुलीविरुद्ध विशेष अदालतले गरेको फैसलाउपर सर्वोच्च अदालतमा पुनरावेदन गरेको छ । 

विशेष अदालतले पराजुलीलाई भ्रष्टाचार निवारण ऐन, २०५९ को दफा ९ र दफा १२ को कसूरमा दोषी ठहर गर्दै दुबै कसूरमा १० महिना कैद र ३० हजार रुपैयाँ जरिवाना हुने तथा अन्य आरोपमा दाबी नपुग्ने फैसला गरेको थियो । साथै, सो मुद्दामा मुछिएका अन्यले सफाई पाएका थिए । 

अख्तियारका प्रवक्ता भोला दाहालले विशेष अदालतबाट भएको उक्त फैसलाउपर आयोगलाई चित्त नबुझेकाले अस्ति सर्वोच्च अदालतमा पुनरावेदन गरिएको जानकारी दिए । पराजुलीले अध्यागमन विभागमा हुँदा घुस लिएको र गलत लिखत तथा सरकारी कागजात सच्याई भ्रष्टाचार गरेको अख्तियारको दाबी छ । 

त्यस्तै, श्रम स्वीकृति नलिई दुबई, कतारलगायतका देशमा मानिसहरु पठाउने, ती देशमा ट्रान्जिट भई अन्य मुलुकमा जान प्रस्थान अनुमति दिने र अभिलेख मेटाउने गरेको उनीमाथि आरोप थियो । २०७६ साउन २१ गते पराजुलीलाई अख्तियारले पक्राउ गरेको थियो । 

उनीसहित मनहरी बराल, दिनेश केएम, तोरण पराजुली, चक्रबहादुर श्रेष्ठ, मनोजकुमार पोखरेल, विजय सापकोटा, शैलेन्द्र ढकाल, वीरसिङ भण्डारी, पदमप्रसाद बजगाईं, जगदिशचन्द्र नेपाली तथा कम्प्युटर अपरेटरहरु रोशन गौतम र भोजप्रकाश न्यौपानेविरुद्ध पनि अख्तियारले २४ लाख ८० हजार रुपैयाँ बिगो दाबी गरी भ्रष्टाचार मुद्दा दायर गरेको थियो ।