बाटो नभएको ठाउँमा पुल बनाउने कर्मचारीविरुद्ध मुद्दा, मन्त्रीलाई उन्मुक्ति

अख्तियार दुरुपयोग अनुसन्धान आयोगले बाटाे नभएको ठाउँमा पुल बनाएर स्रोत दुरुपयोग गरेको आरोपमा तत्कालीन प्रदेश सचिवसहित तीनजनाविरुद्ध मुद्दा चलाएको छ । 

गण्डकी प्रदेश सरकारकाे भौतिक पूर्वाधार, शहरी विकास तथा यातायात मन्त्रालयका तत्कालीन सचिव ईश्वरचन्द्र मरहट्टा, प्रदेश सडक निर्देशनालयका तत्कालीन निमित्त निर्देशक रामकुमार श्रेष्ठ र पूर्वाधार विकास कार्यालय, गोरखाका सिनियर डिभिजनल इन्जिनियर ओमराज ढुङ्गानाविरुद्ध अन्तियारले विशेष अदालतमा मुद्दा दायर गरेको हो । 

प्रदेशको भौतिक पूर्वाधार मन्त्रालयको बजेटबाट गोरखा नगरपालिका– ३ जरेबरस्थित दरौंदी नदीमाथि बाटो नभएको स्थानमा पुल राखेर उनीहरुले राज्यको स्रोत दुरुपयोग गरेको अदालतमा दायर आरोपपत्रमा उल्लेख छ । तत्कालीन सचिव मरहट्टाविरुद्ध पाँच करोड ४५ लाख बढी बिगो तोकिएको छ ।

यो प्रकरणमा तत्कालीन मन्त्री तथा एमाले नेता रामशरण बस्नेत भने चोखिएका छन् । उनलाई निर्णय प्रक्रियामा संलग्न नदेखिएको भन्दै अख्तियारले प्रतिवादी नबनाएको हो ।

गोरखा नगरपालिकाको नारेश्वर र सिरानचोक गाउँपालिकाको जरेबर जोड्न बनाइएको पुललाई मोटर बाटोले छोएको छैन । तर, त्यतिबेलाका मन्त्री बस्नेतले नै पुल निर्माण गर्न स्वीकृति दिएको धेरैको दाबी छ ।