ठट्टै ठट्टामा प्रचण्डद्वारा एमाले अध्यक्षलाई प्रस्ताव ‘आगामी पाँच वर्ष तपाईं राष्ट्रपति,म प्रधानमन्त्री हुन्छ ?’

आज बिहान पनि एमाले अध्यक्ष केपी शर्मा ओली र माओवादी केन्द्रका अध्यक्ष पुष्पकमल दाहाल प्रचण्डबीच बालुवाटारमा भेटवार्ता भएको छ । उहाँहरुबीच मूलतः रविलाई गृह मन्त्रालयमा फर्काउने र राष्ट्रपतिमा एमालेलाई जिताउनेबारे रस्साकस्सी चलेको बताइन्छ।

उहाँहरुबीच बिहान साढे ९ बजेदेखि शुरु भएको वार्ता रवि लामिछाने र उनको पार्टीले गृह मन्त्रालयको जिम्मेवारी आजभित्र पाउनुपर्ने अडान उत्कर्षमा पुगेको बेलामा भएकाले अनेक अनुमान लगाइएको छ।

लामिछानेलाई एमाले अध्यक्ष ओलीले निरन्तर साथ दिँदै आउनुभएको छ । तर प्रधानमन्त्री दाहाल तत्काल उनी त के उनको पार्टीलाई नै गृह दिन अनिच्छुक देखिएपछि आजको भेटवार्तामा उक्त विषयले राम्रै प्रवेश महत्व पाएको बालुवाटार स्रोतको दावी छ ।

एमाले अध्यक्ष ओलीले आज पनि सत्ता गठबन्धन टिकाउनुपर्ने धारणा दोहोर्याउनुभएको छ । बालुवाटार स्रोतका अनुसार आगामी राष्ट्रपति तथा उपराष्ट्रपतिको निर्वाचनसम्म अहिलेको गठबन्धन कायम राख्ने एमाले रणनीति देखिएपछि प्रधानमन्त्रीले पनि हाँसीहाँसी नयाँ राजनीतिक पासा फाल्नुभएको थियो । 

प्रधानमन्त्रीको भनाइ उद्धृत गर्दै स्रोत भन्छ, ‘त्यसो हो भने तपाईं (ओली) र म मिलेर नयाँ प्राक्टिस गरौं । तपाईं राष्ट्रपति बन्नुहोस् ,म पाँच वर्ष प्रधानमन्त्री बन्छु । पार्टीबाट हामीले बिदा लिएर नयाँ पुस्तालाई नेतृत्व हस्तान्तरण गरौं ।’