वर्षमान पुनलाई उपचारको निम्ति फेरि चीन लैजाने तयारी
दुई सातादेखि सुमेरु सिटी अस्पतालमा उपचाररत माओवादी उपमहासचिव तथा पूर्वमन्त्री वर्षमान पुनलाई थप उपचारको निम्ति विदेश लैजाने तयारी शुरु भएको छ । उहाँको कलेजो/मिर्गौला प्रत्यारोपण गर्नुपर्ने निश्कर्ष चिकित्सकहरुले निकालेपछि उक्त तयारी गरिएको बुझिएको छ ।
उपचारमा संलग्न चिकित्सकहरुको टोलीले दुर्लभ किसिमको जण्डिस रोगबाट ग्रसित पुनको पूर्ण स्वास्थ्यलाभको निम्ति कलेजो/मिर्गौला प्रत्यारोपणमा जोड दिएका थिए । सिग्ल्रार नाजार सिण्ड्रोम टाइप २ नामक जण्डिसबाट ग्रसित नेता पुनले यसअघि दुई पटक चीनमा उपचार गराइसक्नुभएको छ ।
उहाँ पछिल्लो पटक गृह जिल्ला रोल्पामा छँदा पेटको समस्या बल्झिएपछि हेलिकोप्टरमा काठमाडौं आएर उक्त अस्पतालमा भर्ना हुनुभएको थियो । त्यसपछि पेटमा जमेको पानी निकालियो ।
अब पनि उहाँको उपचार चीनमा हुने पारिवारिक स्रोतले बतायो । ‘सम्भवतः यो साताभित्रै उहाँलाई विदेश लगिन्छ होला,’ स्रोतले भन्यो, ‘सबै उपचार चीनमा नै हुने सम्भावना छ । प्रत्यारोपण पनि हुन्छ होला ।’
टिप्पणीहरू