प्रधानमन्त्री दाहालको निर्णय अटेर, निगम भन्छ,‘सचिव फेरबदलको प्रभाव पर्यो’

प्रधानमन्त्री पुष्पकमल दाहाल (प्रचण्ड) ले पेट्रोलियम पदार्थको मूल्य घटाउन निर्देशन दिनु भए पनि नेपाल आयल निगमले अटेर गरेको पाइएको छ । हिजो प्रधानमन्त्री प्रचण्डले आम जनतालाई राहत अनुभूत हुने गरी पेट्रोल,डिजेल र हवाई इन्धनको मूल्य कटौती गर्न निर्देशन दिनु भए पनि निगमले अहिलेसम्म कुनै निर्णय लिन सकेको छैन । 

अन्तर्राष्ट्रिय बजारमा पेट्रोलियम पदार्थको मूल्य घटेका कारण सोहीबमोजिम मूल्य समायोजन गर्न प्रधानमन्त्री प्रचण्डले उद्योग, वाणिज्य तथा आपूर्ति मन्त्रालयका सचिवलाई भन्नुभएको थियो । तर,हालसम्म पनि निगम सञ्चालक समितिको बैठकसमेत बस्न सकेको छैन । हिजै सचिवहरुको फेरबदल भएकाले समितिको बैठक बस्न नसकेको निगमका प्रवक्ता विनितमणि उपाध्यायले बताए । 

हिजो बसेको क्याबिनेट बैठकले उद्योग,वाणिज्य तथा आपूर्ति मन्त्रालयको जिम्मेवारी सम्हालिरहेका तोयम रायलाई अर्थ मन्त्रालय पठाएको छ । त्यस्तै, तत्कालीन अर्थमन्त्री जनार्दन शर्माको पालामा अर्थबाट प्रधानमन्त्री तथा मन्त्रिपरिषदको कार्यालय पुगेका मधु मरासिनीलाई तोयम रायको ठाँउ (वाणिज्य) हेर्ने गरी खटाइएको छ । एउटा जाने,अर्को आउने क्रम रहेकाले तत्काल कुनै निर्णय गर्न सक्ने अवस्था नरहेको प्रवक्ता उपाध्यायको भनाइ छ । 

‘पेट्रोलियम पदार्थको मूल्य घटाउन निगम सञ्चालक समितिको बैठक बस्नुपर्छ । सचिवहरुको फेरबदलका कारण हालसम्म बैठक नै बस्न सकेको छैन’,उनले भने,‘हिजो वाणिज्यबाट पत्र आएको छ । छिट्टै नै बैठक बसेर यसबारे निष्कर्षमा पुग्ने छौं ।’ झट्ट हेर्दा नाफामा रहेको देखिए पनि निगम अझै घाटामा रहेको प्रवक्ता उपाध्यायको दाबी छ । उनले सरकारबाट लिएको ऋण तिर्नसमेत नसकेको बताए । 

‘तत्कालको अवस्थामा निगमले इन्धनबाट नाफा कमाइरहेको जस्तो देखिन्छ । तर,समग्रमा मूल्याङ्कन गर्ने हो भने निगम अझै पनि घाटामा छ । सरकारबाट लिएको सात अर्ब रुपैयाँ ऋण अझै पनि तिर्न सकेको छैन्’,उनले सुनाए । 

इण्डियन आयल निगमसंग बाँकी रहेको बक्यौता रकम भने विस्तारै चुक्ता गरिरहेको उनी बताउँछन् । त्यस्तै, इन्धन खरिदको रकम भुक्तानी गर्न निगमले आफ्नै मुख्यालय धितो राखेर ऋण लिएको थियो । टेकूस्थित मुख्यालयको २९ रोपनी जग्गा राखेर निगमले तीन अर्ब रुपैयाँ ऋण पाएको थियो । प्रवक्ता उपाध्यायकाअनुसार निगमले उक्त ऋण चुक्ता गरिसकेको छ । 

१५ दिनमा ९९ करोड रुपैयाँ नाफा

नेपाल आयल निगमले पेट्रोलियम पदार्थबाट अत्याधिक नाफा कमाइरहेको छ । इण्डियन आयल निगमले पछिल्लो पटक पठाएको मूल्यसूचीअनुसार निगमलाई १५ दिनमा ९९ करोड रुपैयाँ नाफा भइरहेको छ । 

नाफा हुँदाहुँदै पनि पेट्रोलियम पदार्थको मूल्य नघटाएको भन्दै हाल विरोध भइरहेको छ । अन्तर्राष्ट्रिय रुपमा घटेर आएको इन्धनको मूल्य समायोजन गर्नुपर्ने माग गर्दै विद्यार्थी संगठनहरु बारम्बार सडकमा उत्रिएका छन् । तर, निगमले हालसम्म पनि इन्धनको मूल्य घटाउन चासो देखाएको छैन् ।