इन्टर्नशीपको माग गर्दै डाक्टर पढेकाहरुको धर्ना

चीन गएर चिकित्साशास्त्रमा स्नातक तह अध्ययन गरि नेपाल फर्किएका विद्यार्थीहरुले सात वर्षसम्म इन्टर्नशीप पूरा गर्न नपाएको भन्दै प्रदर्शन गरेका छन् । चिकित्सा शिक्षा आयोगले जतिसक्दो छिटो इन्टर्नशीप दिलाउनु पर्ने भन्दै आज उनीहरुले माइतीघर मण्डलामा धर्ना थालेका हुन् ।

चिकित्सकको सेता पोशाक लगाएर हातमा कालो पट्टी बाँधेर उनीहरुले बिरोध गरेका छन् । उनीहरुले सरकारको स्पष्टिकरण चाहियो, ढिलासुस्ती बन्द गर, इन्टर्नशीप तत्काल शुरु गर, पुष्टि गर्न ढिला भयो, चिकित्सा शिक्षा आयोगको निर्णय तत्काल कार्यान्वयन गरलगायतका नारा लगाएका छन् ।

कार्यक्रममा संयोजक विष्णुदत्त दुवेदी, समुजल श्रेष्ठलगायत झण्डै ३ दर्जनको उपस्थिति रहेको छ ।