माधव नेपालको उछित्तो काढेको केही घण्टामै ओलीको बोली फेरियो
माधव नेपाललाई पार्टीमा ठाउँ छैन भनेको एक घण्टा नबित्दै एमाले अध्यक्ष केपी शर्मा ओली युटर्न हुनुभएको छ । कार्यकर्तामाझ चर्को भाषण गर्नुभएका ओली पार्टी एकताका लागि भन्दै स्थायी कमिटी बैठक स्थगित गर्न तयार हुनुभएको हो ।
ओलीले काठमाडौँ जिल्ला कमिटी बैठकलाई सम्बोधन गर्ने क्रममा नेता नेपालविरुध्द चर्को भाषण गर्नुभएको थियो । सो क्रममा उहाँले माधव नेपालसहितका २२ जना सांसदले आफ्नै पार्टीको सरकार ढलेर अपराध गरेकाले पार्टीमा स्थान नहुने बताउनुभएको थियो ।
काठमाडौँका कार्यकर्तामाझ चर्को भाषण गर्नुभएका ओली विघटित एकता कार्यदल बैठकको आग्रहपछि एकताको अन्तिम प्रयास भन्दै आजको बैठक स्थगित गर्न सहमत हुनुभएको हो । कार्यदलको बैठकले पार्टी एकताका लागि समझदारी जुटाउन स्थायी कमिटी बैठक स्थगित गर्न आग्रह गरेको थियो ।
यसअघि पनि ओलीले पटक-पटक नेता नेपाललाई पार्टीमा ठाउँ नभएको सार्वजनिक रुपमै घोषणा गरिसक्नुभएको छ । बालुवाटारबाट बालकोट पुगेकै दिन बार्दलीमा उभिएर ओलीले माधव नेपालका लागि एमालेको ढोका बन्द भएको घोषणा गर्नुभएको थियो । त्यसयता पनि ओलीले लगातार निषेधको भाषा बोल्दै आउनुभएको छ ।
आफू कमजोर हुँदा हदैसम्म लचिलो हुने र बलियो भएका बेला कसैका कुरा नसुन्ने गरेको ओलीमाथि आरोप छ । सरकारबाट बाहिरिएपछि तुलनात्मक रुपमा रक्षात्मक बन्नुभएका ओली एकपछि अर्को आफैंले गरेका निर्णयबाट पछि हटिरहनु भएको छ । नेपाल समूहलाई कारवाहीको चेतावनी दिए पनि नेता नेपाललाई दोस्रो अध्यक्ष मान्नसमेत ओली तयार भएको उहाँनिकट नेताहरुले नै बताइरहेका छन् ।
टिप्पणीहरू