श्रीपेच लगाउने शीरमा हेल्मेट सुहाउँदैन भन्दै पारसको समर्थनमा टायर बाल्ने प्रयत्न

पूर्वयुवराजाधिराज पारस शाहको समर्थनमा आज दिउँसो काठमाडौंको महाराजगञ्जस्थित चक्रपथमा राजावादी र राष्ट्रवादीहरुले टायर बाल्ने सुर झिकेका छन् । हिजो साँझ चक्रपथको नारायणगोपाल चोकमा हेल्मेट नलगाई मोटरसाइकल हुईंकाएकाले पारसलाई प्रहरीले नियन्त्रणमा लिएको थियो । प्रहरीले सम्झाई बुझाई गर्दासमेत औंला ठड्याउँदै तथानाम भनेका पारसलाई एक छिनपछि स्थानीय युवाहरुले छुटाएर घर पठाइदिएका थिए ।

हिजो साँझदेखि भाइरल भएको भिडियोमा पारस उद्दण्ड तरिकाले प्रस्तुत भएको देखिन्छ । प्रहरीले नियमानुसार हेल्मेट लगाउन आग्रह गर्दा र कानुनबमोजिम प्रहरी चौकीमा जान आग्रह गर्दा उनी लरबराएको स्वर र शरीरमा प्रहरीमाथि नै जाइलागेका थिए ।

पारस समर्थित युवाहरुले श्रीपेच लगाउने शीरमा हेल्मेट सुहाउँदैन भन्दै आज उनको समर्थनमा नारा, जुलुस र भेला गर्न लागेको बताइन्छ । राष्ट्रवादी युवाहरुले ‘नालायक हत्यारा, बलात्कारीलाई सेल्युट गर्ने बर्दीधारी गुण्डा नेपाल प्रहरीले फेरि पनि गणतन्त्रमार्फत् राजपरिवारको बेइज्जत गर्ने उद्देश्यले युवराज सरकारलाई कारबाही गर्न लागेको हुनुपर्छ । समयले कोल्टे फेर्दै छ । खबदार,अब जनता अन्धो रहेनन् । याद रहोस्,’ भन्दै सामाजिक सञ्जाल रंगाएका छन् ।

उनीहरुले आज दिउँसो १ बजे नारायण गोपाल चोकमा भेला हुन सबैलाई ‘साथीहरु नमस्कार’ भन्दै आग्रह गरेका छन् । सामाजिक सञ्जालमा हिजो बेलुकी नै पोष्ट गरिएको अर्को सामग्रीमा भनिएको छ, ‘पारस शाहप्रति अभद्र व्यवहार गर्ने प्रहरीलाई कारबाही गर्न आवश्यक छ । गाँडतन्त्रका स्यालहरुले पारस सरकारविरुद्ध गरेको व्यवहारप्रति टायर बालेर बिरोध गरौं ।’