रवि लामिछानेविरुद्ध पाँचौँ मुद्दा दर्ता

वीरगञ्जको सानो पाइला बचत तथा ऋण सहकारी संस्थाको रकम हिनामिना प्रकरणमा राष्ट्रिय स्वतन्त्र पार्टी (रास्वपा) का सभापति तथा पूर्वमन्त्री रवि लामिछानेविरुद्ध मुद्दा चलाइएको छ । 

जिल्ला प्रहरी कार्यालयले एक महिनाअघि नै अनुसन्धान सकेर प्रतिवेदन बुझाएकोमा सरकारी वकिलको कार्यालयले आज उनीसहित २९ जनालाई प्रतिवादी बनाएर जिल्ला अदालतमा मुद्दा दायर गरेको हो । गोर्खा मिडिया नेटवर्क प्रालिका तत्कालीन प्रवन्ध निर्देशक रविलाई सहकारी ठगीसँगै संगठित अपराधको कसूर लगाइएको छ । 

अदालतमा दायर अभियोग पत्रमा रविविरुद्ध ११ करोड ५६ लाख बिगो मागदाबी गरिएको छ । त्यस्तै, गोर्खा मिडियाका तत्कालीन उपाध्यक्ष तथा रविका  व्यावसायिक साझेदार पूर्व डिआइजी छविलाल जोशीलाई पनि यसमा प्रतिवादी कायम गरिएको छ । उनीसँग सात करोड २० लाख विगो मागदाबी गरिएको छ । 

वीरगन्ज-६ दर्शनगरमा केन्द्रीय कार्यालय रहेको उक्त सहकारीबाट साढे पाँच हजार बचतकर्ताको दुई अर्ब ३० करोडभन्दा बढी रकम अपचलन भएको अनुसन्धानले देखाएको छ । उक्त रकम जिबी राई अध्यक्ष रहेको गोर्खा मिडियामा गएको प्रहरी अनुसन्धानले देखाएको छ । 

बुटवलको सुप्रिम सहकारी ठगी मुद्दामा भैरहवा कारागारमा रहेका रविविरुद्ध मुद्दा दर्ता भएको यो पाँचौ जिल्ला हो ।