एमआरआई खरिदमा १२ करोड घोटाला, पूर्वउपकुलपतिसहित १३ जनाविरुद्ध मुद्दा

दाङको घोराही उपमहानगरपालिकास्थित राप्ती स्वास्थ्य विज्ञान प्रतिष्ठानकी पूर्वउपकुलपति प्रा.डा.संगिता भण्डारी भ्रष्टाचारमा तानिएकी छन् । उनीसहित १३ जनाविरुद्ध आज अख्तियार दुरुपयोग अनुसन्धान आयोगले विशेष अदालतमा मुद्दा दर्ता गरेको हो । 

मुद्दा चलाइएकामा तत्कालिन कामु रजिष्ट्रार झन्कार लामिछाने, फाईन्यान्स मेनेजर कैलाशप्रसाद देव, बायोमेडिकल इन्जिनियर शरद भण्डारी र अमितकुमार चौधरी, डेपुटी फाइनान्स मेनेजर नितिन कुर्मी, शाखा अधिकृत छायाँ डिसी र श्रीराम चौधरी छन्। 

त्यस्तै, प्रतिष्ठानका आईटी अफिसर हिरालाल भण्डारी, सिभिल इन्जिनियर मदन भण्डारी, वरिष्ठ सहायक अन्जु शर्मा, बायोमेडिकल इन्जिनियर सुजाता भट्टराई र लुम्बिनी हेल्थकेयर प्रालिका अध्यक्ष पोष्टराज ज्ञवालीउपर पनि मुद्दा दर्ता भएको छ । 

उनीहरूले आपसी मिलेमतोमा कम गुणस्तरको एमआरआई मेशिन किनेर १२ करोड सात लाख ६ हजार ९४६ रुपैयाँ भ्रष्टाचार भएको अख्तियारको ठहर छ । आरोपपत्रमा भ्रष्टाचार निवारण ऐन, २०५९ को दफा ८ बमोजिम उक्त रकम असुलउपर गरी प्रतिवादीहरूलाई कैद र जरिवानाको सजाय मागदाबी गरिएको छ ।