मोहनको साथ छोड्नासाथ आइलाग्याे मन्त्री

आफूलाई सिन्धुपाल्चोकको स्थायी सरकार दाबी गर्ने कांग्रेस केन्द्रीय सदस्य तथा निलम्बित प्रतिनिधि सभा सदस्य मोहनबहादुर बस्नेतलाई साथ छोड्नेहरूको लर्को लाग्न थालेको छ ।

२०७९ को संघीय निर्वाचनमा बस्नेत सिन्धुपाल्चोक क्षेत्र नं २ बाट विजयी भएका थिए । उक्त क्षेत्र साविक ३ मा कांग्रेसले पहिलोपटक माओवादी र एससँग गठबन्धन गरेर जितेको हो । सोही क्षेत्रको प्रदेश (ख) बाट कृष्णकुमार तामाङ (समिर) ले बस्नेतको साथ छाडेका छन् । नुवाकोटका बहादुरसिंह लामालाई बाग्मतीको मुख्यमन्त्री हटाउन अग्रभागमा हस्ताक्षर गर्नेमा कृष्णकुमार तामाङ (समिर) समेत थिए । इन्द्र बानियाँलाई साथ दिएका कृष्णकुमार अहिले बागमती प्रदेशमा खानेपानी, ऊर्जा तथा सिँचाइमन्त्री भएका छन् । 

निकट स्रोतका अनुसार गत वैशाखमा समिर मेलम्ची र हेलम्बुका केही कार्यकर्तासहित सिपा–२ (ख) को लागि विभिन्न योजना लिएर आर्थिक मामिला तथा योजना मन्त्रालय हेटौंडामा मन्त्री कुन्दन काफ्लेलाई भेट्न गए । काफ्लेको सचिवालयले मोहन बस्नेतलाई यसबारे विस्तृत विवरण दियो । बस्नेतले काफ्लेलाई फोन गरेर त्यो योजना कुनै पनि हालतमा नपार्न अनुरोध शैलीमा थर्काए । उनले भनेका थिए ‘भोलि बागमतीको नेता हुन्छ, त्यो भोटेसँग पैसा छ,, केटाहरू पनि टन्नै छन् । तिनीहरूलाई अघि बढ्न दिनु हुन्न । हाम्रो अधिनमा राख्नुपर्छ’ त्यसपछि कुन्दन काफ्लेले दोलखाली नरे भन्ने मानिसको घरसम्म भन्दै रु. १००० को खुद्रो योजनासमेत हाले । 

समिरले पछिल्लो समय बस्नेतको हेपाई खाँदै आएका थिए । त्यहीमाथि बस्नेतको असली व्यवहार देखेपछि उनीबाट टाढिने उपयुक्त मौका हो भन्दै सम्बन्धबिच्छेद गरे । र, इन्द्र बानियाँको सम्पर्कमा पुगे । मेलम्चीका मेयर आइतमान तामाङको राम्रो सम्बन्ध छ, इन्द्र बानियाँसँग । समिर र आइतमान फरक कित्तामा थिए । २०७४ मा समिर मेलम्ची वडा नं. ४ को सदस्यमा निर्वाचित भए । २०७९ को स्थानीय निर्वाचनमा उनले आइतमानलाई खुलेर सहयोग गरेका थिएनन् । उता समिरले पनि प्रदेश सभाको टिकट पाउने आश गरेका नै थिएनन् । बढीमा मेयर, नत्र वडाध्यक्षसम्मको आशा थियो । तर, सोचेभन्दा ठूलो भाग पाए । प्रदेश सभा निर्वाचनमा समिरलाई आइतमानको टिमले खासै सहयोग गरेन । ३ दलीय गठबन्धन, मोहनको दबदबा र एमालेभित्र २४ क्यारेट र २२ क्यारेट अर्थात् ओली पक्ष र १० बुँदेका कारण एमाले जित्ने निर्वाचन गुमाएको थियो । हस्त पण्डित जस्तो राजनीतिज्ञलाई राजनीतिमा योगदान र क्षमता नभएकाले हराएका थिए । 

शुरुमा जहाँ जाँदा पनि मोहनले समिरलाई सँगै लिएर हिँड्थे, समिरले पनि मोहनको साथ छाडेका थिएनन् । तर मोहन बस्नेतविरुद्ध विशेष अदालतमा भ्रष्टाचार मुद्दा दायर भए देखि नै समिर टाढा हुन थालिसकेका थिए । त्यही माथि उनको योजना बस्नेतले कुन्दनलाई काट्न लगाएपछि, के चाहियो र ? पछिल्लो समय मेलम्ची मेयर आइतमान तामाङका र प्रदेश सभा सदस्य कृष्णकुमार तामाङको (समिर) जुगलबन्दी हेर्नलायक छ । रोचक कुरा त मोहनबहादुर बस्नेतले आजसम्म पनि समिरलाई बधाई दिएका छैनन् ।