पुल बेच्दै, मोबाइलमा पैसा तान्दै

सरकारी सम्पत्ति रक्षा गर्नुपर्ने दायित्व बोकेका काभ्रेका दुई वडाध्यक्ष मिलेर रोशी खोलामा बगेको फलामको पुलका पार्टपुर्जा कवाडीमा बिक्री गरेपछि खियाको सराप लागेको चर्चा चल्न थालेको छ । जिल्ला आएको एक महिना पनि नपुग्दै एसपी कोमल शाहले अराजक समूहलाई नियन्त्रणमा लिने क्रममा वडाध्यक्ष सोमबार पक्राउ परेका छन् । 

माओवादीबाट निर्वाचित वडाध्यक्ष अशोक गौतम पटक–पटक विवादमा तानिने गर्थे । कहिले राजधानीमा वडाबासी नागरिकलाई ललाई फकाई पुर्‍याएको त कहिले आफ्नै पार्टीका कार्यकर्तासँग रकम लिएर काम नगरिदिएको अनेक विषय छन् । केही महिनाअघि उनले फलामको झोलुंगे पुल बिक्री गरेर राजश्व हिनामिना गरेको भन्दै परेको उजुरी पनि ढिसमिस भएको थियो ।

नमोबुद्ध नगरपालिका–६ र रोशी गाउँपालिका वडा नम्बर ७ का वडाध्यक्षले पुलको सामान विना प्रतिस्पर्धा कवाडीलाई बिक्री गरेका हुन् । बिक्री गरेर कवाडीमा लैजाँदै गरेका दुई ट्रक सामान कटुञ्जे प्रहरी चौकीले नियन्त्रणमा लिएको थियो । २०८१ असोज १०–१२ मा परेको अविरल वर्षातका कारण पक्की पुल रोशी खोलाले बगाएको थियो । उक्त पुल बगाएपछि खोलामा डाईभर्सन गरी अस्थायी सडक सञ्चालन गरिएको छ । पुल नबन्दा र सामान छरपस्ट हुँदा यात्रुहरूले सास्ति ब्यहोरिरहेका छन् । अनुमतिबिना सरकारी सम्पत्ति बिक्री गरेको अभियोगमा प्रहरीले रोशी खोलाबाट मंगलबार राति दुई ट्रक नियन्त्रणमा लिएको हो । 

कटुञ्जे प्रहरी चौकीमा सई मनु सापकोटा इञ्चार्ज छिन् । उनकै नेतृत्वमा खटिएको टोलीले रोशी पुलका सामग्री कवाडीमा बिक्री गर्न लागेको सूचनाका आधारमा अनुसन्धान गर्दा दुईवटा ट्रक नियन्त्रणमा आएको हो । प्रहरीले बिक्री अनुमति नभएको फेला पारेपछि कवाडी ब्यवसायीले वडाध्यक्षहरूले पत्र दिएको बताएका थिए । रोशी गाउँपालिका–७ का अध्यक्ष गौतम र नमोबुद्धका टीकाबहादुर केसीले वडा कार्यालयको सिफारिस दिएका थिए । कवाडीलाई बिक्री गरेको रकम आफैँ लिने योजना थियो । अन्य तीन ट्रक कटिङ्ग गरिएको अवस्थामा खोलामा तयारी राखिएको छ । उनै वडाध्यक्ष अशोक गौतमले अर्काे पुलको सामान कवाडीमा बिक्री गरी क्यु आरमार्फत मोबाइलमा रकम लिएका थिए । उक्त रकम पनि सरकारी कोषमा जम्मा गरिएको छैन । खुला लिलामी गर्नुपर्नेमा त्यसो पनि गरिएन । 

– मोतीराम तिमल्सिना