कांग्रेसमा ‘क्लिन चिट’ का कुरा

भिजिट भिसा काण्डमा थुप्रै नागरिक ठगिएको कारण राजीनामा दिन दबाब बढेपछि गृहमन्त्री रमेश लेखकले सोमबार सभापति शेरबहादुर देउवाको निवासमा बिलौनाका थुप्रै शब्द खर्चिए । विवादास्पद सह–सचिव तीर्थराज भट्टराईलाई अध्यागमनतिर ल्याउनुमा कुनै स्वार्थ नरहेको जिकिर गरे । स्वार्थभन्दा बाध्यतावश ल्याउनुपरेको पनि दाबी गरे । 

शान्त र शालीन स्वभावका लेखकले बिलौना गरेपछि सभापति शेरबहादुर देउवाको मन पग्लियो । उपसभापति पूर्णबहादुर खड्का, महामन्त्री गगन थापा, प्रवक्ता डा. प्रकाशशरण महत, नेता विमलेन्द्र निधिदेखि शशांक कोइरालासम्मले लेखक निर्दोष रहेको प्रमाणपत्र नै पार्टीले दिनुपर्ने दलिल पेश गरे ।

लेखकले पार्टीलाई अप्ठ्यारो पर्छ, आवश्यकता महसुस गर्छ भने राजीनामा दिएर सहयोग गर्छु भन्न पनि भुलेनन् । अनि देउवासहितका नेताले एक स्वरमा भने–राजीनामा, साजीनामा पर्दैन, चुपचाप काम गर्नुस् । देउवाले २०४८ सालमा गृहमन्त्री हुँदा दुई बच्चाको ज्यान गएको विषय कोट्याउँदै ‘गोलीको आँखा हुँदैन’ भनेको विषय स्मरण गराए । गगनले गुटको कुरा गरे । 

रेशम चौधरी पक्राउ, बेचन झाको अनुसन्धान प्रभावित गर्ने गरी प्रहरीको सरुवा, सर्लाहीको बरथहवा नगरपालिका ४ का एक जोडीको प्रेमविवाह तोडाउने कामसम्ममा लेखक आलोचित छन् । यसैमा थप जटिलता बोकेर भिजिट भिषा प्रकरण आयो । यसमा लेखकले दिएको दलिल उनीजस्ता टाठा र कानुन बुझेका मान्छेसँग मेल खाँदैन ।