उता जग्गा निरीक्षण, यता ‘राजा आउ देश बचाउ’ को नारा

पछिल्लो १० दिनदेखि नगरकोटको रिसोर्टमा बसेर राजनीतिक भेटघाट गर्दै आउनुभएका पूर्वराजा ज्ञानेन्द्र शाह आज काभ्रेपलाञ्चोक पुग्नुभएको छ । मण्डनदेउपुर नगरपालिकास्थित हिमानी ट्रष्टको नाममा रहेको जग्गाको वस्तुस्थिति बुझ्न उहाँ परिवरारका सदस्यहरुसहित बिहान त्यहाँ जानुभएको बताइन्छ ।

मन्डनदेउपुरको वडा नम्बर ५ स्थित मार्सेमा ४२ रोपनी जग्गा किनेर ट्रष्टको नाममा राखेपनि पूर्व राजाले हालसम्म प्रत्यक्ष नदेखेकाले नगरकोट पुगेको मौकामा पूर्व रानी कोमल, बुहारी हिमानी, छोरी र नातिनीहरुसहित त्यहाँ पुग्नुभएको हो ।

उक्त जग्गा खरिदको बेलामा निर्मल निवासले हिमानी ट्रष्टकै केही विश्वासिला पात्रहरुलाई खटाएको थियो । आज पूर्व राजपरिवार केही सहयोगीसहित तीन वटा गाडीमा त्यहाँ पुगेको हो ।

जग्गा हेरेपछि पूर्व राजाले डोजर लगाएर सम्याउनुपर्ने सल्लाह दिनुभएको र पूर्व युवराज्ञी हिमानीको कृषि परियोजना थाल्ने चाहना रहेको बताइन्छ । 

करिब आधा घण्टा जग्गामा टहलिएपछि उहाँहरु त्यहाँबाट फर्कनुभएको हो । पूर्व राजाले काभ्रेमा जग्गा अवलोकन गरिरहँदा यता काठमाडौँमा नवराज सुवेदीहरु ‘राजा आऊ देश बचाउ’ को नारा लाउँदै मोटरसाइकल र्याली निकाल्दै थिए ।

फाेटाे : सामाजिक सञ्जाल  ।