रविविरुद्ध चितवनमा मुद्दा दर्ता, सवा ३८ करोड ठगेको दावी

चितवनको सहारा सहकारी ठगी प्रकरणमा पूर्व गृहमन्त्री तथा राष्ट्रिय स्वतन्त्र पार्टीका सभापति रवि लामिछानेविरुद्ध पूरक अभियोजन दर्ता भएको छ । 

जिल्ला सरकारी वकिलको कार्यालयले आज रविसहित १५ जना व्यक्ति र ६ संस्थाविरुद्ध अदालतमा मुद्दा दायर गरेको हो । सवा ३८ करोड रकम हिनामिना भएको उक्त सहकारीबाट लामिछाने तत्कालीन प्रबन्धक निर्देशक रहेको गोरखा मिडियामा १० करोड ८० लाख १८ हजार गएको प्रहरीको अनुसन्धानले देखाएको छ । 

दर्ता नम्बर ०८१-सी१-०५७२ रहेको मुद्धामा लामिछानेसहित छविलाल जोशी , रामबहादुर खनाल, रविना रिमाल, विशाल गुरुङ, नवीन अछामी, कविता तामाङ, दिपक लामा, असरफअलि सिद्दिकी, भगवती बम्जन, लक्ष्मीप्रसाद पौडेल, विज्ञान राई, नेत्रपाणी बास्तोला, शिवबहादुर गुरुङ र प्रगति श्रेष्ठलाई प्रतिवादी बनाइएको छ । त्यस्तै, सहकारीबाट रकम गएका कम्पनीहरु गोर्खा मिडिया नेटवर्क प्रालि, नेचर हव इन्टरनेशनल प्रालि, जिवी ग्रुप अफ कम्पनी, स्प्रिङ उड स्टेट हाउजिङ प्रालि र नेचर नेष्ट प्रालि पनि प्रतिवादी छन् । 

जिल्ला सरकारी वकिलको कार्यालयले गत साता नै मुद्धा दर्ताको तयारी गरे पनि अनुसन्धान प्रतिवेदनमा केहि त्रुटी देखिएको भन्दै जिल्ला प्रहरी कार्यालयलाई फिर्ता गरेको थियो । प्रहरीले प्रतिवेदन सच्याएर पेश गरेसँग आज मुद्धा दर्ता भएको हो । उक्त सहकारी ठगी प्रकरणमा यसअघि असोज ८ गते १७ जनाविरुद्ध मुद्धा दर्ता गरिएको थियो । 

स्मरण रहोस्, सूर्य दर्शन सहकारी ठगी प्रकरणमा कात्तिक २ गते पक्राउ परेका लामिछानेलाई पोखरा जिल्ला अदालतले ६५ लाख धरौटी तोकेको थियो । त्यस्तै, स्वर्ण लक्ष्मी सहकारी ठगी प्रकरणमा काठमाडौँ जिल्ला अदालते ६० लाख र सुप्रिम सहकारी ठगी प्रकरणमा रुपन्देही जिल्ला अदालतले एक करोड धरौटीमा रिहा गर्न आदेश दिएको थियो । लामिछानेले तीन जिल्लामा तोकिएबमोजिमको धरौटी बुझाएर हिरासतमुक्त भइसकेका छन् ।