मोटरसाइकल चोरेर नम्बर प्लेट फेर्नेहरु समातिए
मोटरसाइकल चोर्ने तीन जना समातिएका छन् । काठमाडौं उपत्यकाका विभिन्न स्थानमा मोटरसाइकल चोरी गर्दै आएका उनीहरुलाई प्रहरीले नियन्त्रणमा लिएको हो ।
पक्राउ पर्नेमा काठमाडौंको सितापाइला बस्ने झापाका युवराज राई, नवीन भट्टराई र भक्तपुर बस्ने मकवानपुरका प्रेमबहादुर पाख्रिन रहेका छन् । उनीहरुले चोरीको मोटरसाइकलमा नम्बर प्लेट फेरेर चलाउने गरेको पत्ता लागेको छ ।
हिजो ललितपुरको बालकुमारीस्थित सडकमा युवराज र नवीन सवार बागमती प्रदेश ०२–०२–०२७ प ४३२३ नम्बरको शंकाश्पद मोटरसाइकल प्रहरीले चेक गरेको थियो । चेकजाँच गर्दा मोटरसाइकलको वास्तविक नम्बर बा.प्र.०२–०४९ प २४१३ रहेको थापा भएको हो ।
प्रहरीका अनुसार उक्त बाइक बुधबार काठमाडौंको माछापोखरीबाट हराएको भन्दै लाललोप्चान तामाङले प्रहरीमा निवेदन दिएका थिए । अनुसन्धानको क्रममा नवीनले मोटरसाइकल प्रेमबहादुरबाट लिएको खुलेको छ । त्यसपश्चात् प्रेमबहादुरलाई कौशलटारबाट बा.प्र.०२–०४९ प ०२०९ नम्बरको मोटरसाइकलसहित नियन्त्रणमा लिएको प्रहरीले जनाएको छ ।
उक्त मोटरसाइकल पनि मंगलबार लोकन्थलीस्थित आफ्नो घरअगाडिबाट हराएको भन्दै कैलाश लोक्ताम लिम्बुले निवेदन दिएको खुल्न आएको प्रहरीको भनाई छ । पक्राउ परेका तीनै जनालाई आवश्यक छानबिन तथा कारबाहीका निम्ति प्रहरी वृत्त बालाजु पठाइएको काठमाडौं उपत्यका ट्राफिक प्रहरी कार्यालयले जानकारी दिएको छ ।
टिप्पणीहरू