गरिब परिचयपत्र हुनेलाई अस्पतालमा निःशुल्क उपचार

आर्थिक अवस्था कमजोर भई उपचार गराउन नसकेका बिरामीले काठमाडौं महानगरपालिकाभित्रका निजी तथा साझेदारी अस्पतालमा निःशुल्क उपचार पाउने भएका छन् । 

महानगरले गरिब परिचयपत्र भएका बिरामीले सोझै अस्पतालमा गएर सेवा लिन सक्नेगरी नि:शुल्क उपचारको व्यवस्था मिलाएको हो । लक्षित वर्गको निःशुल्क उपचारका लागि महानगर क्षेत्रभित्रका सम्पूर्ण निजी तथा साझेदारी अस्पतालहरुलाई पत्राचार गरिएको स्वास्थ्य विभागको निमित्त विभागीय प्रमुख सजिना महर्जनले बताइन् । 

गत फागुन १ गतेदेखि निःशुल्क उपचार शुरु गरिएको उनले जानकारी दिइन् । उनका अनुसार गरिबी परिचयपत्र नभएका बिरामीहरुले ‘काठमाडौं महानगरपालिका अस्पतालमा निःशुल्क उपचार सेवा उपलब्ध गराउनेसम्बन्धी कार्यविधि, २०८०’ को अनुसूची २ बमोजिम निवेदन र आर्थिक अवस्था खुल्ने फाराम भरेर सम्बन्धित कार्यालयमा बुझाउनुपर्नेछ । 

वेवारिसेको हकमा वडा कार्यालय तथा प्रहरी कार्यालयको सिफारिसको आधारमा निःशुल्क उपचार प्रदान गर्ने व्यवस्था मिलाइएको उनको भनाइ छ । 

स्वास्थ्य संस्था सञ्चालन मापदण्ड, २०७७ को दफा ७० (घ) र काठमाडौं महानगरपालिका जनस्वास्थ्य ऐन, २०८० को दफा २८ मा सम्पूर्ण अस्पतालहरुले कूल शैय्याको १० प्रतिशत शैय्या लक्षित वर्गलाई निःशुल्क उपचारका लागि छुट्याउनुपर्ने उल्लेख छ ।