प्रधानमन्त्रीको पत्रकार सम्मेलन नजिकैबाट एक दर्जन क्रान्तिकारी पक्राउ
प्रधानमन्त्री पुष्पकमल दाहाल प्रचण्डले त्रिभुवन अन्तर्राष्ट्रिय विमानस्थलको अति विशिष्ट कक्षमा पत्रकार सम्मेलन गरिरहँदा अखिल क्रान्तिकारीका १३ जना विद्यार्थी पक्राउ परेका छन् । नेकपा बहुमत पार्टी निकट अखिल क्रान्तिकारीका नेता तथा कार्यकर्ताले प्रधानमन्त्रीको भारत भ्रमण र नागरिकता विधेयक प्रमाणीकरणको विरोधमा नाराबाजी गर्न खोजेपछि प्रहरीले हस्तक्षेप गरेर नियन्त्रणमा लिएको हो ।
उक्त संगठनका १३ जना विद्यार्थीलाई सवा ७ बजेको समयमा प्रहरी वृत्त गौशाला पुर्याइएको छ । त्यसअघि आजै अपरान्ह पौने ५ बजेको समयमा नेकपा बहुमत निकट अखिल क्रान्तिकारी केन्द्रीय सदस्य मिलन राईलगायत चार जनालाई प्रहरीले नियन्त्रणमा लिएको थियो ।
त्यसपछि सोही संगठनको अर्को समूहलाई प्रहरीले पक्रेको हो । उक्त संगठनका उपाध्यक्ष वीरेन्द्र साहसहित दुई जनालाई ५ बजेको समयमा नियन्त्रणमा लिएर प्रहरी वृत्त गौशाला पुर्याइएको थियो ।
त्यसपछि वैद्य समूह निकट अखिल क्रान्तिकारीका अध्यक्ष हरिकृष्ण गजुरेलसहित तीन जना पनि पक्राउ परेका थिए । उनीहरुलाई पनि प्रहरी वृत्त गौशाला लगिएको थियो ।
प्रधानमन्त्रीको विरोध गर्न सिनामंगल पुगेका सामाजिक अभियन्ता उद्धव बस्नेतलाई पनि प्रहरीले नियन्त्रणमा लिएको जनाइएको छ ।
टिप्पणीहरू