रवि लामिछानेविरुध्द अख्तियारमा उजुरी दर्ता

दोहोरो राहदानीसम्बन्धी विवादमा पूर्वगृहमन्त्री तथा राष्ट्रिय स्वतन्त्र पार्टीका सभापति रवि लामिछानेलाई 'क्लिन चिट' दिने प्रहरी र सरकारी वकिलको निर्णयविरुध्द अख्तियार दुरुपयोग अनुसन्धान आयोगमा उजुरी परेको छ ।

सर्वोच्च अदालतमा रिट हालेर लामिछानेको सांसद र मन्त्री पद खुस्काइदिएका सिन्धुलीका युवराज सफलले महान्यायाधिवक्ता,प्रहरी र सरकारी वकिलविरुध्द आज अख्तियारमा निवेदन दर्ता गराएका हुन् । सी-०४८३०१ दर्ता नम्बर रहेको निवेदनमा मुद्दा चलाउन यथेष्ट प्रमाण हुँदाहुँदै सरकारी मिलेमतोमा लामिछानेलाई उन्मुक्ति दिइएको दावी गर्दै अनुसन्धानको सक्कल मिसिल झिकाएर आवश्यक अनुसन्धान अघि बढाउन माग गरिएको छ । 

 युवराजले जिल्ला प्रहरी परिसर काठमाडौँका एसपी दानबहादुर कार्की, मुद्दा शाखाका एसपी, डिएसपी र अनुसन्धान अधिकृतसमेतको मिलेमतोमा लामिछानेलाई सफाई दिन जिल्ला वकिलको कार्यालयमा गलत प्रतिवेदन बुझाइएको जिकिर गरेका छन् । 

'तत्कालिन अमेरिकी नागरिक रवि लामिछानेले अमेरिकी नागरिकता कायम हुँदै राहदानी विभागलाई गुमराहमा राखेर नेपालि राहदानी लिएको भन्दै जिल्ला प्रहरी परिसर काठमाडौँमा राहदानी दुरुपयोगसम्बन्धी फौजदारी कसूरमा किटानी जाहेरी दिएको थिएँ । तर, हालसालै जिल्ला प्रहरी परिसरका एसपी दानबहादुर कार्की, मुद्दा शाखाका एसपी, डिएसपी, अनुसन्धान अधिकृतसमेतको मिलेमतोमा सफाई दिनुपर्छ भनि जिल्ला वकिलको कार्यालयमा प्रतिवेदन बुझाएको पाइयो', निवेदनमा भनिएको छ । 

मुद्दा चल्ने यथेष्ट प्रमाण हुँदाहुँदै कसूरदारलाई पक्राउ नगरी आर्थिक लेनदेन, पदीय स्वार्थ र शक्ति केन्द्रको चलखेलमा फौजदारी कसुरका कसूरदारलाई उम्क्याउन प्रहरीले आफ्नो अख्तियारीको गलत प्रयोग गरेकाले तत्काल अनुसन्धान प्रतिवेदनको सक्कल मिसिल झिकाई आवश्यक अनुसन्धान गरी दोषी प्रहरी अधिकारीहरुलाई कारवाही गर्न युवराजले माग गरेका छन् ।  

त्यस्तै, सर्वोच्च अदालतको  संवैधानिक इजलासले समेत राहदानी ऐन २०२४ र २०७६ बमोजिम लामिछानेको राहदानीसम्बन्धी मुद्दा निरुपण गर्नुपर्ने फैसला गरेको स्मरण गराउंदै निवेदनमा महान्यायाधिवक्ता, उच्च सरकारी वकिलको कार्यालय र सरकारी वकिलको कार्यालय काठमाडौँ पनि यसका मतियार रहेको दावी गरिएको छ ।   

'जिल्ला सरकारी वकिल कार्यालयका काठमाडौँका प्रमुख अच्युतमणि न्यौपाने, उच्च सरकारी वकिल कार्यालय पाटनका कार्यालय प्रमुख कृष्णमोहन कोइराला र महान्यायाधिवक्ता कार्यालयका प्रमुख दिनमणि पोखरेलले समेत पदीय दायित्व एवम् अख्तियारी दुरुपयोग गरि लामिछानेलाई क्लिनचिट दिने निर्णय गरेकाले त्यससम्बन्धी सक्कल फाइल झिकाई अनुसन्धान गरी हदैसम्मको कारवाही गरिपाउँ', निवेदनमा भनिएको छ ।